ABANTU abayisithupha baseNingizimu Afrika bazothola ithuba lokuyofundela umculo eManhattan School of Music (MSM), eNew York, ngemuva kokusungulwa komfundaze ngenhloso yokuhlonipha ingwazi ye-jazz engasekho, uHugh “Bra Hugh” Masekela.
Ukumenyezelwa komfundaze, iHugh Masekela Heritage Scholarship, kuqondane nosuku azalwa ngalo uMasekela njengoba namhlanje ubezobe egubha iminyaka engu-80.
UBra Hugh ushone nyakenye ngemuva kokuxinwa wukugula. Umfundaze uqalwe yiMSM neThe ELMA Music Foundation ngokubambisana neHugh Masekela Heritage Foundation, uzokwethulwa ngokusemthethweni namhlanje.
Kuzothathwa abafundi abayisithupha kuleli bayokwenza iziqu zeBachelor of Music eMSM. Umfundaze uzokhokhela zonke izindleko zokufunda nezokuhlala zomfundi ngamunye, zeminyaka emine egcwele.
UBra Hugh wenza izifundo zeClassical Trumpet eMSM. UMengameli weMSM, uJames Gandre uthe uBrah Hugh ungomunye wabake baba yizitshudeni zabo ezihlonishwayo.
“Izitshudeni zizokwamukelwa ngabafundi abasafufusa abeza esikoleni besuka emazweni angu-45 emhlabeni jikelele.”
KUZOKWETHULWA ngokusemthethweni umfundaze oqanjwe ngoHugh Masekela esikoleni iManhattan School of Music namhlanje
USihlalo weHugh Masekela Heritage Foundation, uSolwazi Louis Molamu uthe bayaziqhenya ngokuba kulolu bambiswano. Kwenye yezinkulumo zakhe uBra Hugh wathi: “Into engiyithanda ngokweqile wukukhombisa ama-Afrika nomhlaba ukuthi abantu base-Afrika bangobani ngempela.
Ukungenela izitshudeni, kumele zigcwalise izicelo ku-apply.msmnyc.edu/apply. Izicelo zizokwamukelwa phakathi kukaSepthemba 1 kuya kuDisemba 1.Owezokuxhumana kwiHugh Masekela Heritage Foundation, uMarang Setshwaelo, uthe umfundaze uvuleleke kunoma wubani owakuleli.