NGEMUVA kwesonto ebelwe izindondo zakhe, kuthiwa ibhange lisabisa ngokufaka endalini umuzi wakhe ngoba ehluleka ukuwukhokhela.
Kuthiwa ibhange iNedbank lihlela ukufaka endalini umuzi womculi uZahara ogamalakhe langempela uBulelwa Mkutukana oseRuimsig, eRoodepoort, ngoMeyi 7, 2022.
Lokhu, ngokwemibiko evelayo yingoba sekuphele izinyanga eziyisithupha ehluleka ukukhokha imali engangoR17 665.40. Le mali kumele ayikhokhe nyangazonke ukuze aqede isikweletu sale ndlu ebiza uR1.9 million.
Ngokusho kwakhe, uZahara, uthi ubhekene nobunzima bokukhokha ngenxa yohlelo lomvalelandlini olwafika nohulumeni ngenxa yokuhlasela kweCorona kodwa uyazama ukulungisa leso simo.
“NgoDisemba ngakhokha uR100 000, ngabuye ngakhokha uR80 000 ngeFebhuwari, ngithi ngizama ukukhokhela nalezi zinyanga engizohluleka ngazo.
Uthi kungakubi uma ezodlelwa umuzi ngenxa yezinyanga ezimbili ezedlule angakwazanga ukuzikhokhela.
Ezinkundleni zokuxhumana kuke kwaqubuka nezinkulumo ngama-video obekubonakala kuwo lesi silomo somculo, sisolwa ngokucwila ezinkanjeni zikaFaro okuphazamisa ikusasa laso lomculo. UZahara ubelokhu eyiphike njalo eyophuzo oludakayo.