ABACULI bakamaskandi nomrepha bazoke bakhohlwe kancane i-microphone ne-studio kodwa bahubhane nebhola ezinkundleni zemidlalo zaseMboleko Sports Complex ngoLwesibili kusukela ngo-6 ntambama. Abagqugquzeli bale ngqophamlando yomdlalo, ebizwa ngeHip Hop vs Maskandi Football Match, ngumrepha uSiyabonga "Big Zulu" Nene nomaskanda, uKhuzani "Indlamlenze" Mpungose.
UBig Zulu uthe bahlele lo mdlalo ngenhloso yokuba abaculi balezi zinhlobo zomculo bake bakhiphane inkani enkundleni yebhola.
"Ngizofika nesikimu sami kusasa (esho namhlanje) noKhuzani afake esakhe. Ay'khale," kusho uBig Zulu osanda kuhlabana ngendondo yeBest Collaboration kumaSouth African Music Awards ngenoni lakhe elithi Imali Eningi. Kwenzeka lokhu nje uBig Zulu akasabhekani nomaskanda, uMthandeni “Igcokama Elisha” Manqele kubangwa ubunxusa namatemu.
UKhuzani uthe namhlanje kuzodalulwa abaculi abazomela lezi zinhlobo zomculo.
"Kusasa (esho namhlanje) ngo5 ntambama sikhipha uhlu lomaskanda abane nabe-hip hop. Ngakho lulindeleni," kusho uKhuzani oqophe umlando nyakenye ngenoni lakhe elithi Ijele njengoba avotelwa ngabantu abangaphezu kuka-900 000 kwiTop 10 yoKhozi FM.
UKhuzani ube esenxusa abalandeli bale miculo ukuba bebe beqagela abaculi abazobe beboshelwe ezikimini. "Sekonakele. Sengikhona mina, usekhona uBig Zulu. Umbuzo uthi wobani abayisithupha abazosijoyina kusasa (esho namhlanje). Lasuka lahlala," kuphetha uKhuzani.
Laba baculi asebengamathe nolimu sebeyizilomo kuleli kangangoba bangamanxusa emikhiqizo eminingi. Muva nje bebeqhakambisa umqhudelwano webhola obuxhaswe ngabe Carling Black Label. UKhuzani waseNkandla ubuye abe yinxusa lakwaJonathan D kanti uBig Zulu waseBergville uyinxusa lakwaBrentwood neleSpitz.