CHARLES KHUZWAYO
IZIHLABANI zomculo kamaskandi, Abafana BakaMgqumeni, zibungaze unina kaNgizwe Mchunu, uMaNtombela, esaphila ngenxa yamagalelo endodana yakhe emzini wakwaMseleku. Abafana BakaMgqumeni, ebebeholwa nguNelisani "Ndlemnyama" Mseleku noSakhiseni "Skhevane" Mseleku batheleke kubo kaNgizwe beqiqinge yonke inhlobo yokudla neziphuzo.
Echaza uNdlemnyama ngenhloso yokuvakashela eMabhuqwini, eNkandla ngoLwesine, uthe ukuyozibongela kuMaNtombela ngokubazalela iqhawe.
" UNgizwe uyena owafaka itshe lesikhumbuzo elibeni leBhova (okuyiziteketiso zikaMgqumeni Khumalo ongasekho). Waletha ishumi lezinkomo, kwaba nomcimbi omkhulu wokuvulwa kwetshe le Bhova. Ngamanye amazwi wasiza thina singumndeni kaKhulekani Kwakhe Mseleku (okungamagama angempela kaMgqumeni) ngokuhloniphisa iliba lenkosi yomaskandi lahlonipheka.
Sithe asimbonge esaphila uNgizwe, sabonga nomama, sabonga nobaba wakhe uMganomanxeba ngokuzala iqhawe lesizwe sonke. UNgizwe wayemkhonzile uMgqumeni ephila noma esekhotheme. Uzokhumbula ngisho ukutshalwa kweBhova kwahlehla kulindwe uNgizwe noTshatha ababephesheya kwezilwandle," kuphawula uNdlemnyama.
Uthe ngezinkomo ezafika noNgizwe basale sebegcina eminye imisebenzi yakwaMseleku. Babekade babefisa ukuzobonga abazali bakaNgizwe naye uqobo ngokubambesa izinqe ezazihleli obala.
Abagcinanga ngokunikezela ngokudla kodwa babuye bembesa oMacingwane ngezingubo ebezibonakala ukuthi zimba eqolo.
Ephawula uMaNtombela uthe okwenziwa uNgizwe kwaMseleku kwakufanele ngoba namanje akekho umculi osafika kuMgqumeni.
"Ngiyaqala nje mina empilweni yami. Bengingazi empilweni ukuthi kukhona umuntu owumaskandi osakwazi ukuphila noNgizwe. Ngihlale ngizwa izinhlamba. Kuyangethusa. Ngeke ngiyeke ukubathanda ngoba bacula umculo wesintu." Ube esebonga kakhulu uShembe futhi wabusisa laba baculi bakamaskandi asebebuya konandisa nakoSeychelles naseRussia. "Ngicela kwande lapho nithathe khona ngoba kuyacaca ukuthi kuphuma ekujuleni kwezinhliziyo."
Uziqedile izithameli ngehlaya ngesikhathi ekhala ngokuhlushwa wuNgizwe.
"Zikhona izinhlanya emhlabeni kodwa zihlanya emihosheni yangakubo. Lolu lwami lugijima izwe lonke. Ngivele ngingazi ukuthi ngizokwenzenjani," kuphetha uMaNtombela. UNgizwe uthe akwenzayo ukubukela kunina ngoba kuningi akwenzayo emphakathini ekubeni engasebenzi futhi engafundanga.
"Nakimi uma ngihamba emhlabeni, abantu babona ubaba, babone umama. Nami ngike ngikubuke kumama. Umama ziningi kakhulu izinto azenzile emphakathini, engasebenzi futhi engafundile."
Uthe maningi amagalelo kanina kodwa engabongwa, kunalokho uthukwa ngezinhlamba.
"Ngakufaka lokho emoyeni. Engiyikho angikuthathanga komunye umuntu," kusho uNgizwe. Ubonge kakhulu kuBafana BakaMgqumeni ngabamenzele khona.