Sikhulu isililo emhlabeni ngoBelafonte
UHARRY Belafonte udlule emhlabeni ekwakhe ngoLwesibili Isithombe:FACEBOOK
ISILILO siqhuma phezulu kumagumbamane omhlaba ngokudlula emhlabeni kweciko elaliyisishoshovu somzabalazo wabantu abamnyama eMelika, uHarry "King of Calypso" Belafonte. Ongumkhulumeli kamufi, uKen Sunshine, utshele iphephandaba laphesheya kwezilwandle, iThe New York Times, ukuthi leli qhawe lidlule emhlabeni emzini walo oseManhattans ngoLwesibili. UBelafonte (96) wazakhela udumo eNingizimu Afrika nge-albhamu ayiqopha noMiriam Makeba eyayisihloko sithi An Evening with Belafonte/Makeba ngo-1965.
Leli cwecwe lenza uMiriam waqopha umlando ngokuba wumculi wokuqala wase-Afrika jikelele ukuhlabana ngendondo kumaGrammy Awards ngo-1966. Yayinamanoni ayethi Hush, Hush (Thula Thula), In The Land of the Zulus (KwaZulu), To Those We Love (Nongqongqo), Ndodemnyama Verwoerd, Give Us Our Land namanye ayehlabahlosile.
UNgqongqoshe wezobuCiko namaSiko nezeMidlalo kuleli uhloniphe uMiriam namanye amaciko aseke ahlabana kulo mqhudelwano odume umhlaba wonke ngoLwesine ngenxa yale-albhamu. Sekungumlando ukuthi uMiriam wahamba emhlabeni emuva kokuwa enandisa esteji e-Italy ngo-2008. UBelafonte, owaduma ngamazwi athi "Angibanga Yiciko Elaba Yisishoshovu Kodwa Ngaba Yisishoshovu Esaba Yiciko," ubedume ngele-King of Calypso ngenxa yengoma yakhe eyaqhakambisa ikhono lakhe kwezomculo nohlobo lomculo ayelicula. UBelafonte, owayengumngani omkhulu wesishoshovu somzabalazo esingasekho, uMartin Luther King Jr, wayengahambisani nombuso yobenguMengameli wase-USA, uMnuz Donald Trump nemigomo kaMnuz George W Bush, naye owayengumengameli wakulelizwe.
Kwababhonge emswanini, ngokuguqa kwale ngqalabutho, kubalwa uMengameli wase-USA; uMnuz Joe Biden, uMengameli wokuqala omnyama walelizwe, uMnuz Barack Obama; umlingisi uTyler Perry nomethuli wezinhlelo zethelevishini u-Oprah Winfrey. Abanye osaziwayo ngoSpike Lee, John Legend, Viola Davis nomndeni wakwaMakeba. Kuze kwashaya isikhathi sokushicilela kungakaziwa ngezinhlelo zokufihlwa kwalo qolothakamango oyibekile induku ebandla emhlabeni namaphethelo.