Owokholo uzobuyisa ithemba ngendumiso ebantwini
UMCULI wowokholo uNokulunga MaZwide Ndlela ukhuza ibuya emva kweminyaka eyisithupha ehlabe ikhefu emculweni
Image: SITHUNYELWE
UKUKHOLELWA ekutheni ukudumisa uNkulunkulu ngomculo kuyasiza ukubuyisa ithemba ebantwini abadangele nababhinjelwa yizinto - ngenye yezinto ezikhuthaze umculi wowokholo uNokulunga MaZwide Ndlela ukukhuza ibuya ngomcimbi yomculo wendumiso yabukhoma, emva kwekhefu leminyaka eyisithipha engakhiphi umculo omusha.
Lo mculi, owagcina ukukhipha nge-albhamu yakhe yokuqala eyayithi Wozani Sihambe yango-2019, uzokwenza umcimbi awubiza ngeNokulunga Mazwide Ndlela: Live Recording Worship in Spirit & Truth, ngoMgqibelo ngoJulayi 26, e-Eagle Mountain Prophetic, eSouth Beach, eThekwini kusukela ngo-11 ekuseni kuze kube yintambama.
Engxoxweni neSolezwe Ngempelasonto, uNokulunga uthe manje ubone sekuyisikhathi esikahle sokuthi adedele umculo wakhe omusha emva kwekhefu leminyaka eyisithupha kungahlangani lutho oluqondene nomculo ngenxa yokuswela amandla okumelana nezindleko zokuqopha nokukhipha umculo njengoba konke okumayelana nomculo wakhe kubheke yena emehlweni ngoba usebenza ngokuzimela.
"Emva kwe-albhamu yami yokuqala yango-2019 izinto azihambanga kahle neze emculweni wami ngenxa yokuswela amandla okuqhubeka, ngathiywa nawukuthi njengoba bese ngiganile bekudingeka ukuthi ngibhekane nempilo yomndeni wami, ngibala nokukhulisa umntwana engimthole ngo-2022, kodwa okukhulu kunakho konke yimali," usho kanje.
UMCULI wowokholo uNokulunga MaZwide Ndlela ukhuza ibuya emva kweminyaka eyisithupha ehlabe ikhefu emculweni
Image: SITHUNYELWE
Eqhuba, uthe manje ngoba asekhona amandla okuqhubeka, ubone kukuhle ukuthi ahlanganise abantu abathanda umculo wakhe nabakholwayo ukuzobaduduza, futhi abuyise ithemba ngomculo wakhe wendumiso, akholwa wukuthi iyasiza kulokho.
"Lokhu ngikusho ngoba ngazi kahle ukuthi kunjani ukuphelelwa yithemba entweni oyithandayo noyifisayo ngoba ubona izinto zingalungi, yingakho ngalo mcimbi ngizoqhulula amanoni ami ayisithupha bukhoma, kubalwa nelithi Enkosi Moya Oyingcwele, engilikhiphe ngoFebhuwari nonyaka, engipike kulona uMxolisi Mbethe," kusho uNokulunga.
Kuwo lo mcimbi uNokulunga uzobe ephelezelwa ngamaciko okukhona kuwona oPutuma Tiso, Sibani Sevangeli, Mxolisi Mbethe, Kwenza Cele, Mzie Cele, Zuzu Nyombolo, Nomnini Nyawose, Yakhani Mnyandu, Malungu Ndlovu, Andiswa Keti, Pastor Linda Makhaye, Sfiso Mazibuko noKhanyo Ndlela.
Uthe emva kwalo mcimbi; uhlela ukwenza olunye uchungechunge lwemicimbi efuze lona lapho ezohambela khona kwezinye izindawo zaKwaZulu-Natal, eGauteng, eWestern Cape nangalapho adabuka khona e-Eastern Cape.
Amathikithi alo mcimbi wamanje ayatholakala eWebtickets nasePick n'Pay ngoR100 i-general noR150 i-VIP.