AMACIKO akuleli ahlele ukhukhulelangoqo wenkonzo yesikhumbuzo ezokuba seNewtown, eGoli ngo-Agasti 12 kusukela ngo-2 emini ngenhloso yokukhumbula ozakwabo abadlule emhlabeni ngalesi sikhathi se-Covid-19. Omunye wabagqugquzeli bale nkonzo, uSbongile Mngoma uthe maningi amaciko asebashiyile emhlabeni.
"Ngithunywe ngaBahlali ukwazisa abasendimeni yezamasiko neyezobuciko jikelele ukuthi ngomhla ka-12 August sizobe sinenkonzo yesikhumbuzo yawo wonke amaciko asishiye emhlabeni phakathi kuka2020 no2021. Sifuna ukubahlonipha..."
Kosaziwayo abadlule emhlabeni ngalezi zinsuku kubalwa obengumlingisi nophrojusa weThe Queen, uShona Ferguson, umlingisi uMary Twala, umlingisi uCandy Moli, owayengumsakazi nomphathi woKhozi FM uBhodloza Nzimande, umsakazi uBob Mabena, inkakha yombhaqanga uSteve Kekana, uPat Shange, umculi wokholo uPeter Mokoena, ingwazi ye-Afro jazz uTshepo Tshola, umlingisi uMotodi Neshehe, unjiiyela womculo uJan Smith, umaskanda uSkhindi Zondi, umculi wokholo uMalibongwe Gcwabe, umculi we-bubblegum uPatricia Majalisa, umculi uPinkie Mtshali, umlingisi uThandeka Mdeliswa, umculi uSergeant Malishe; umlingisi uDelani Khumalo; umculi wekwaito uMshoza, umculi wekwaito uMojalefa “Mjokes” Matsane nabanye.
Uthe nalabo abangahlonishwanga ngemingcwabo esezingeni likahulumeni nabangawatholanganga amazwi enduduzo kungqongqoshe walo mnyango bazobakhumbula.
"Bayingxenye yethu. Ukufa kusihlukumeze sonke." Uthe okunye okubenze baqhamuka nale nkonzo ukuthi abakwazi ukuhambela imingcwabo. "Yingakho singaBahlali sithathe isinqumo sokuba nale nkonzo yesikhumbuzo sanoma yiliphi iciko elisishiyile." USbongile unxuse umphakathi ukuba uthumele amagama amaciko adlule emhlabeni ngesikhathi salo mbhedukazwe.
"Noma ngabe ushone ngokhwantalala, uzibulele, noma yingani. Siyacela nisithumelele amagama nezithombe zabo ukuze sibahloniphe," kuphetha lo mzwilili we-opera.