IZITHAMELI ezizohambela umcimbi wokumenyezelwa kwabanqobe kuma-16th South African Traditional Music Achievement (Satma) Awards esifundazweni saseMpumalanga namhlanje, zizozitika ngomculo ohlukahlukene. Ngokusho kwesitatimende esithunyelelwe imithombo yezindaba ngabagqugquzeli balo mqhudelwano wezindondo, phakathi kwabaculi abazobe benandisa kubalwa inkakha ye-Afro pop, uKelly Khumalo; izilomo zomculo wama-piano, uReece Madlisa noZuma; izingwazi ze-Afro jazz, Isitimela nesihlabani sikamaskandi, uNtencane. Kubaculi abadlana imilala kulo nyaka kukhona uSjava, Sgwebo Sentambo, Candy Tsamandebele, Q.Twins, Magcwabe, Kwazi Nsele, Menzi Mabizela nabanye.
Ngaphandle kwabaculi abadumile kuzobuye kushiyelane inkundla amaqembu agida ingoma yesintu ezizwe ezihlukahlukene njengesamaVenda; Sepedi; Swati; amaNdiya; amaBhunu; Tsonga namaNdebele.
Lo mcimbi uzobanjelwa eMbombela, esifundazweni saseMpumalanga. Abangazowabona bukhoma amaSatma, bazobuye bawabone kwesinye seziteshi zakwaSABC ekupheleni kwalo nyaka.