Bazobanga isiteki sikaR50 000 abe-acapella
IQEMBU lesicathamiya i Zulu Messengers lithi ukuthuka kwalo ngokuqokwa kuma- Satma kuhambisane nenjabulo njengoba selokhu lagcina ukuba kulemiklomelo yezindondo isaqala eminyakeni edlule
KUZONANDISA izihlabani zomculo wesicathamiya emncintiswaneni wesiteki sikaR50 000 ngoNovemba 20, eCinema kwa-W eMlaza.
Kulo mncintiswano weMlazi Acapella Music, ozoqala ngo-9 ekuseni kuze kube u-6 ntambama, kuzoqhudelana amaqembu awu-16, ahlungwe kwinhlolokhono eyenziwe izikhawu ezimbili.
Umsunguli nomgqugquzeli weBrush Mncadi Foundation, uBrush Mncadi, uthe konke sekumi ngomumo ngomncintiswano njengoba namathikithi okungena eseqalile ukutholakala.
“Njengoba kuqala ngqa ukuthi kube nomcimbi ofana nalo eMlaza, sifuna ukuqopha umlando sishiye isigxivizo abangasoze basikhohlwa abathandi bomculo we-acapella. Zinkulu izinhlelo esinazo ngeqembu elizothatha isicoco. Uhlelo esiyoqala ngalo ukuthi lithole ithuba lokucotshelelwa ngolwazi lomkhakha womculo. Sizobe sesiqhubeka nezinhlelo zokuthi liqophe icwecwe lalo,” kubeka uMncadi.
Amathikithi okungena atholakala esangweni ngoR100 kuya kuR150 umuntu emunye. Phakathi kwabazobe bengamajaji emcimbini kubalwa uSandile Dlamini odlala indawo kaPhakade Bhengu kwiMbewu, uSamkelisiwe Mkhize wodumo lweJoyous Celebration, umsunguli woMlazi Gospel Choir, uSakhile Ncanana noMandla Ntuli waBanqobi.
Kwabanye abazobe benandisa kubalwa uBahubhe, uMlazi Gospel Choir, uMlazi Levitie , Amazing Grace neqembu lendlamu, Amajinge.