Intobeko ivula iminyango kochuma kowe-house ne-gqom
UMCULI wodumo lwezingoma ze-house ne-gqom uZeh McGeba
Image: SITHUNYELWE
UKUZITHOBA nokuhlale enomoya owodwa kulelo nalelo thuba alitholayo lokusebenza namaciko ahlonishwayo kwezomculo, yizona zinto azichaze ngezisiza ukuthi athole amathuba amaningi okuchuma endimeni uZeh McGeba.
Ungomunye wabaculi abasaqhubeka nokugqama emculweni wama-piano, igqom, i-house ne-afro pop.
UZeh McGeba (28), uqale ukugqama endimdeni yomculo ngengoma kaDlala Thukzin ethi Sohlala Sisonke, akagcinanga lapho njengoba eqhubekile wezwakala kwezinye izingoma ezishisa izikhotha okukhona kuzona iKhuphuka nePalesa kaDJ Tira, iNdonele kaDJ Fisherman, iNgisale Nobani kaBig Zulu neTaiko Drum apikwe kuyona wuMorda Bongz.
Leli ciko elidabuka ePort Shepstone, lakhulela eMawoti, eNanda, enyakatho yeTheku, lithe lize lifika lana elikhona manje nje - indaba iqale ngo-2012 ngenkathi liqala ukuqopha umculo, likhuthazwa wumngani walo - elalicula naye kwikhwaya ngakubo.
"Yonke leminyaka kwaze kwaba wu-2017 bengilokhu ngiqopha nje umculo, ngifunda nezinto eziningi zomculo kwayikhane ngikhipha ingoma yami yokuqala eyayisihloko sithi Take Me Higher, okwangikhuthaza ukuqhubeka nawo ngingabe ngisabheka neze emuva, njengoba sekuhambe kwaze kwafika kulesi sigaba esengikusona manje ngobuciko bami," usho kanje.
Uthe okunye okumsebenzele futhi kwamsiza ukufika lana esekhona manje wukungenisa ezinkundleni zokuxhumana ngokuqopha ama-video ezingoma ezipholile zesiNgisi, yena aziguqule azenze zizwakala ngesigqi sesintu, okuze kwadoba iso nendlebe kaDlala Thukzin.
UMCULI wodumo lwezingoma ze-house ne-gqom uZeh McGeba
Image: SITHUNYELWE
"Nalapho futhi angisebenzisanga lelo thuba ukuphakamela abanye abantu, kunalokho ngilokhu ngizithobe njalo, engibona kungisiza kakhulu ukuthola amathuba okusebenza nala maciko ahlonishwayo esengisebenze nawo ngoba ukusebenza nami kulula ngoba ngithobekile, engibona kuzongisiza ibanga elide ukuqhuba umculo," kusho uZeh McGeba.
Eqhuba, udalule ukuthi okwamanje usasebenza ngokuzimela emculweni, nokho bakhona abakhombisa intshisekelo yokuthi asebenze ezinkampanini zabo, okuzobonakala ngokuhamba kwesikhathi ukuthi kuqhubeka kanjani, ngoba akanankinga nokusayina esitebeleni somculo esithile inkani uma kuzohambisana nemibandela yakhe.
"Okwamanje ngizoqhubeka ngikhulise igama lami kuze kube wukuthi sengisesigabeni sokukwazi ukukhipha umculo wami omningi ngikhulululekile," kusho uZeh McGeba ogama lakhe lokuzalwa wuSabelo Zulu. Ngaphandle komculo, futhi uwumholi wekwaya yebandla akhonza kulona i-Anthem Church, eliseDurban North, eThekwini.