UZOKHUMBUZA abalaleli bomculo kamaskandi izinsuku zakudala uKhuzani ‘Indlamlenze’ Mpungose emcimbini wakhe iFull Up Moses Mabhida, njengoba elande abasakazi boKhozi uNgizwe Mchunu noKhathide ‘Tshatha’ Ngobe bodumo loTalagu.
Indlamlenze imemezele lezi zindaba ekhasini layo ku-Instagram lapho idalule khona ukuthi laba basakazi ababezibiza ngoTalagu kuSgiya ngeNgoma bazoshaya into yabo ndawonye esteji.
“UNgizwe noTshatha bathi bazobe bekhona kwiFullUp kaMaskandi futhi bazobe bewuTalagu njengoba ngafikela ngaphansi kwesandla sabo besasakaza uSgiya ngengoma oKhozini.Kulomcimbi kuzodlalwa bazobe besakaza belingisa okokuqala mhla beqala ukudlala ingoma yami kuSgiya ngengoma bazobe bekulingisa bukhoma lokho phambi kwezinkumbi zabantu eMabhida,” kusho uKhuzani.
UNgizwe noTshatha bagcina ukuzwakala besakaza ndawonye ngonyaka ka-2013 oKhozini ngaphambi kokuthi bakhishwe kulolu hlelo kwafakwa uZimiphi “Zimdollar” Biyela noBheka “BK” Mchunu.
View this post on Instagram
A post shared by Khuzani"INdlamlenze"Mpungose(@khuzani_mpungose) on Sep 13, 2018 at 5:16am PDT
Noma uKhuzani engakaluqinisekisi usuku lwalo mcimbi ezinkundleni zokuxhumana, Isolezwe lihoshe ukuthi iFullUp izoba ngoDisemba 8.
Isolezwe lithole ukuthi umcimbi kaKhuzani uzobizwa ngeFull Up Moses Mabhida Stadium ngenxa yokuthi uCassper uthe igama leFill Up ngelakhe alibhalisile.
UMnyango wezobuCiko namaSiko kuzwelonke kuthiwa yiwo ozothwala izindleko zomcimbi kaKhuzani.