U-DJ Hlo ebuholini bophiko lweqembu iMK

INTOKAZI yaseThekwini eyaqopha umlando ngokuba wuDJ wokuqala wesifazane ukuhlukanisa unyaka kuKhozi FM ngo-2021, uHlosiwe "DJ Hlo" Mthalane, useyiPhini loMgcinimafa kuzwelonke ophikweni lesikhashana olubhekene namaciko eqenjini likaMnuz Jacob Zuma, iMK Party.

Isolezwe liqinisekise lezi zindaba encwadini ebhalwe yinhloko yezokuxhumana lweMK Creative Command, uNksz Zemfundo Zuma.

Ngokusho kwale ncwadi eputshukwe kwabezindaba, uHlo ukhethwe ngentando yeningi emhlanganweni weMK Creative Command and Control Interim Task Team ngoMsombuluko.

"Sijabule kakhulu ukwazisa wonke amaciko ngomhlangano esibe nawo ngoMeyi 19, oqale ngo-8.05 ebusuku kwaze kwashaya u-10.15. Sibe nomhlangano esenze ngawo kwaba nenqubekela phambili ezinhlosweni zethu njengamaciko. Umhlangano uhambe kahle kakhulu. Sithinte yonke imininingwane futhi sathatha ezinye izinqumo. Ngakho siyacela namukele nabu ubuholi beMK Creative Command and Control Interim Task Team."

Lo buholi bumi kanje, uMengameli uTebogo Sithathu wodumo kumaTwins, iPhini likaMengameli umculi we-Afro jazz, uBheki Nqoko (Njilo), uNobhala-Jikelele uWandile Nsibande, iPhini likaNobhala uMzamo Dlungwana wePI Movement), uMgcinimafa-Jikelele uRashid Khumalo, uMgqugquzeli u-Andile Nkomo weKasi Empire, iPhini loMgqugquzeli uWonder Hadebe, bese iNhloko yezokuxhumana kuba uZemfundo.

Ethintwa uDJ Hlo (27) ngalezi zindaba uvele wacela ukungaphawuli kodwa wacela kuthintwe ubuholi beMK Creative Command.

UDJ Hlo obuye abe kwiMK Women's League nakwiMK Youth League, washiya kwi-ANC nyakenye, ngoba ebona engaqashwa ekubeni abehla enyuka nabaholi bayo kusakhankaselwa ukhetho.

Ngaphandle kokuhlukanisa unyaka oKhozini, uDJ Hlo ubuye wahlabana ngomklomelo weBest Star Club DJ kumaShinning Star Africa Awards ngo-2023, futhi waqokwa emkhakheni weBest DJ kumaZikomo Africa Awards abeseZambia ngo-2022.

Njengamanje usanda kukhipha umucu awenze naMatycooler othi Hamba, awuqophe ngokuhlanganyela noMenzi Mabizela, iParradise noVezy othi Ngiyakuthanda ngaphansi kweMaz Entertainment Volume 1.

Akagabile ngekhono lokudijeya kuphela kodwa uneziqu zeSocial Science azithola e-UKZN futhi unendawo yokucwala izinwele nokuziphaqula kuDr Yusaf Dadoo eThekwini.