Sikhulu isililo ngokudlula emhlabeni komculi weJazz

Kuzamazama umhlaba wonke ngokudlula emhlabeni kwenye yezingqalabutho emculweni we-jazz kuleli, uTebogo Louis Moholo-Moholo. Lo mdlali wama-drums, obehlonishwa umhlaba wonke, ushone ngezintathakusa zangoLwesihlanu eseneminyaka ewu-85.

UBra Louis bese kuyena kuphela obesaphila eqenjini le-jazz eladingiselwa eLondon ngo-1964 ngenxa yokuphikisana nobandlululo, iThe Blue Notes.

Kuleli qembu wayenoChris McGregor, Mongezi Feza, Dudu Pukwana, Nikele Moyake noJohnny Dyani. Leli qembu lafike laguqula umculo we-jazz i-Europe yonke ngenxa yokufika nesigqi seTownship Jazz yaseWestern Cape ngeminyaka yo-1960.

Isolezwe lalimenyiwe emcimbini wokubungazwa kweThe Blue Notes noBheki Mseleku kwiLondon Jazz Festival e-UK ngo-2014. Laze lathola ithuba lokuxoxisana naye uBra Louis kanye nomdlali wophiyano, u-Abdullah Ebrahim.

Umndeni uthe usazomemezela ngezinhlelo zokukhunjulwa nokufihlwa kwaleli qhawe elidabuka elokishini laKwaLanga, eWestern Cape