UMETHULI wezemidlalo kwisikhondlakhondla somsakazo, Ukhozi FM, uNolwazi Machi-Khumalo, ulobe incwadi ekuthatha ikubeke ngempilo yakhe.
Kule ncwadi, esihloko sithi Isithombe Sepasi, uNolwazi ukhininda ngokukhula kwakhe kuze kufike manje ngeqoqo lezinkondlo.
Le ntokazi yakwaDweshula ePort Shepstone kodwa esihlala eMthwalume, ithe kuyithathe iminyaka emibili ukuloba leli bhukwana elinamakhasi angu-94.
Uthe okwenze athathe iminyaka emingaka yingenxa yokuthi uhlale ematasatasa.
“Kuningi engikwenzayo njengoba ngiwunkosikazi, nomama. Ngiyavuma impela, akulula ukwenza le misebenzi njengoba yonke ifuna ngiyinake ngendlela elinganayo. Ngibonga ukuba nomndeni nozakwethu abangisekelayo nabebengigqugquzela ukuba ngifeze iphupho lami. Le ncwadi ikhuluma ngemicabango yami kusukela ngisemncane kuze kufike manje sengimdala. Ngibazisa kabanzi ngengidlule kukho kodwa ngendlela ehlekisayo.”
Ukuba matasatasa nomsebenzi wokusakaza akumvimbanga ekuqhubeni izifundo zakhe.
Yize leli khono kukhona ebebengalazi kodwa yena uthi useke waziloba izinkondlo ezishicilelwe ngabanye osonkondlo.
Eminye imisebenzi yakhe yezobuciko ibuye yashicilelwa encwadini ethi, Amahlokohloko, Izimbali Zesizwe, Izinkwazi ZoThukela nethi Thyini. Uthe ugqozi nofuqufuqu lokubhala ukuthole kwinkunzi emidwayidwa enguSolwazi Nomakanjani Sibiya.
Ngaphambi kokujoyina uphiko lwezemidlalo, uNolwazi uke wabhalela iphephabhuku lengwazi yomethuli wezinhlelo zethelevishini i-Oprah Magazine SA eCape Town. Wabe esejoyina inhlangano yezokusakaza kuleli njengomethuli wezinhlelo zezindaba nophrojusa oKhozini.