OweMetro FM othandweni oluvuthayo nesikhulu somsakazo

UMSAKAZI weMetro FM, uMpumi "Msakazi" Mlambo, ukuqedile ukuqagela ngobudlelwano bakhe noDJ osengumakadebona, uPhestus  Matshediso odume ngelikaFistaz Mixwell. UMpumi (33), osakaza uhlelo oluthi The Encore with Mpumi Mlambo ngoMgqibelo ngo-12 emini, uphumele ngomjolo wakhe noFistaz Mixwell (49) ezinkundleni zokuxhumana.

Uvele wafaka isithombe enoFistaz Mixwell kumaMetro FM Music Awards ku-Instagram maqede wabhala kanje "Guys sek'vele kwajoleka phela."

Le ntokazi ibhala kanjena nje bekuvele kunamahlebezi okuthi ujola naleli ciko emuva kokuba lezi zithandani zachitha amaholidi kaKhisimusi ndawonye ngoDisemba owedlule.

Kuvela lezi zindaba nje, uFistaz Mixwell wake waveza ukuthi usothandweni oluvutha amalangabi noMpumi ngoFebhuwari. Angithi naye wabhala ukuthi "Yi-birthday yomunt' wami vandag (namhlanje ngesiBhunu). Impilo imnandi kukhona wena kuyo. Happy Birthday Mpumi Mlambo."

Asebekhohliwe ukuthi ngubani uFistaz Mixwell, empeleni uDJ odabuka eNorth West obeshisa izikhotha eminyakeni eyedlule. Abaningi bazomkhumbula ngamanoni ayethi I'm Free, Hade Mabhebeza nelithi Keeps Changing My Mind. Waqala ukuduma kuleli nge-albhamu yakhe yokuqala eyayithi It's Time ngo-1999 kangangoba yaze yadayisa amakhophi angaphezu kuka-25 000.

Kusukela lapho akabange esabheka emuva njengoba agcina esenandisa ngisho naphesheya kwezilwandle. Ngo-2004 uFistaz Mixwell wabe esejoyina iMetro FM njengomphathi womculo. Ngaphandle kwalokho njengamanje uyinhloko yeNew Media and Technology kulo msakazo futhi yena noTbo Touch bangabanikazi benkampani yezobuchwepheshe iTouchMixwell.com.