ZONKE izindlela zibheke emcimbini wokumenyezelwa kwabahlabene kumaSouth African Traditional Music Achievement (Satma) Awards eSuncoast Casino, eThekwini, ngalo Mgqibelo ngo-7 ebusuku.
Umculi kamaskandi, uKhuzani "Gatsheni" Ndlovu, angase akuphinde akwenze kumaSouth African Music Awards njengoba akhala wemuka neBest Maskandi neBest Male. NakumaSatma uqokwe kwiBest Maskandi nakwiBest Song of the Year ngenoni elisashisa izikhotha kulezi zinsuku, iHit After Hit.
Umsakazi weJozi FM, uPenny Ntuli, nodadewabo onguMabusi kuMkhokha The Curse, uHope Mbhele, baqhathwe kwiBest Traditional Social Media Influencer.
Abasakazi boKhozi FM, uTshatha Ngobe noBingelela Mpanza, baqhathwe nozakwabo wakuMhlobo Wenene, uGudlabatshakazi, kwiSABC Best Traditional Radio Presenter.
Amanye amaciko adlana imilala emikhakheni ehlukene kulo mqhudelwano wakulo nyaka kubalwa uLwah Ndlunkulu, Mthandazo Gatya, Fanie Dick, Dicksy Dee Mdlalose, Phumzile Mlangeni, Ngilozi Mdolomba, Nqobile "Modelkazi" Dlamini, Zamambo Mkhize, Blaq Diamond, Mzukulu, uGatsheni, Sminofu, Gqizile, Shumi Lezinsizwa noMdumazi.
Kule ndumezulu yomcimbi kulindeleke izithameli ezingaphezu kuka-3000 okubalwa kuzo iSilo Samabandla, uMisuzulu kaZwelithini, abaNtwana baseNdlunkulu kaZulu, amakhosi, ongqongqoshe namaciko ahlukahlukene.
Ngokusho kwesitatimende esithunyelelwe abezindaba, uhlelo lwalo mcimbi luzobe luphethwe wusomahlaya uMduduzi Ntuli.
"Izithameli zizozitika ngobumnandi obuzobe bethulwa ngamaciko aseqophelweni eliphezulu. AmaSatma azobe ebungaza ababambe iqhaza ekufukuleni amagugu namasiko akuleli ngamagalelo abo ekukhululeni iNingizimu Afrika nabantu bayo njengoba bebezabalaza yonke le minyaka ewu-30 ukuze babone iNingizimu Afrika ekhululekile. Bonke laba bantu abazohlonishwa basaqhubeka nokulwa izimpi ezingapheli ukugcina amasiko, izilimi namagugu akuleli."
Siqhuba isitatimende sithe abagqugquzeli balo mqhudelwano wezindondo bathole inqwaba yemingenelo kulo nyaka.
"Siyabonga ukuseseka kwabantu bakuleli ngalolu hlobo kangangoba indawo izobe igcwele phama. Lokhu kukhombisa indlela okwesekwa ngayo amaSatma Awards."
