Kuzonqamuka imbadada kubhiklwa indlamu

I-KANGAROO Zulu Dancers esike yabamba iqhaza kuShaka Marine World Zulu Dance Competition Isithombe: ESIGCINIWE

KUZOBE kuhlephuka imbadada emqhudelwaneni wengoma waminyaka yonke i-2022 Ushaka Marine World Zulu Championship, eThekwini, kusukela ngo-Ephreli 23 kuya ku-24, kuze kulamule umhla ka-30.

Izithameli zizobuye zishebe Indlamu noMzansi nomculo kamaskandi ozobe uqhululwa yingwazi, uPhuzekhemisi. Kulindele ukuba lesi sihlabani esesidume umhlaba wonke, ukuba sicule amanoni aso okubalwa kuwo elithi Imbizo, Inkunzi Kabhejane, Izwi Alithuthuki, Ngo'49, Inja Yami namanye.

I-KANGAROO Zulu Dancers esike yabamba iqhaza kuShaka Marine World Zulu Dance Competition Isithombe: ESIGCINIWE

LELI ngelinye lamaqembu eselike lashiya izithameli zibambe ongezansi kuShaka Marine World Zulu Dance Championship Isithombe: ESIGCINIWE

Nakuba uPhuzekhemisi engatholakalanga ukuba aphawule kodwa Inhloko yaseShaka Marine World, uNdabo Khoza, ikuqinisekisile ukuthi lo mculi uzonandisa ngabo-12 emini.

UKhoza uthe bathungatha amaqembu azodlana imilala kwi-2022 Ushaka Marine World Zulu Dance Championship. Uthe kulokhu lo mncintiswano bawenza ngokubambisana noMnyango wezobuCiko namaSiko KwaZulu-Natal.

UPHUZEKHEMISI uzobe eyibhikla kanje ingoma kuShaka Marine World Zulu Dance Championship, eThekwini, ngesonto elizayo Isithombe: ESIGCINIWE

"Amaqembu azobe eqhudelana ngenhloso yokuhlabana eminxeni emibili, okungoweNdlamu nowoMzansi. Umzuliswano wamanqamu uzobanjelwa kule ndawo ngo-Ephreli 30, 2022."

Lo mncintiswano waminyaka yonke, kuhloswe ngawo ukunikeza abagidi bengoma ingqayizivele yethuba lokuba baqhakambise amakhono abo ezivakashini zamazwe ngamazwe.

"Enye inhloso ukulekelela amaciko avuke azithathe emuva kokuphazanyiswa ukubheduka kwegciwane leCovid-19," kuphetha uKhoza.