Kuzodingidwa ezinqala kumgubho we-Africa Day

KUZOKHULUNYWA kabanzi ngezihloko ezishisa ubuzi nezinomthelela ezintweni ezingamagugu e-Afrika embuthanweni oseDurban Music School, kuDiakonia Road, eThekwini, ngeSonto, kusukela ngo-10.30 ekuseni.

Lokhu kushiwo umqondisi weGcinamasiko Arts and Heritage Trust, uDkt Gcina Mhlophe, othe lo mkhosi uzobe uyingxenye yomgubho wamagugu ase-Afrika.

"Kule ngxoxo kuzobe kukhona izithunywa ezizobe zivela ezinhlanganweni esidlelana nazo iTraversing Liminality, Afrikology Institute, Red Lights Choir, Gcinamasiko neMazisi Kunene Foundation, okuyizo ezizobe zibambe iqhaza." Kulo mcimbi kuzonandisa intokazi eshaya umculo wesintu uZawadi YaMungu neRed Lights Choir. UZawadi usanda kuhlabana ngomklomelo weBest African Female Musician kumaLadies in Media Awards eGhana. UDkt Mhlophe ngomunye wamaciko ahlonishwayo kuleli ngenxa yamagalelo akhe kuleli nasemazweni aphesheya. 

UDkt Mhlophe wahlonishwa ngeziqu zobudokotela emkhakheni wePhilosophy in Visual and Performing Arts yiDurban University of Technology nyakenye, ngenxa yomsebenzi omuhle weminyaka ebhala futhi ehaya izinkondlo, izincwadi, imidlalo yeshashalazi nokuba ngumgqugquzeli wezamasiko ezweni nasemhlabeni jikelele.

Le ngwazi inesikhungo esifundisa amakhono okubhala iGcinamasiko Arts and Heritage Trust. Lo qolothakamango waziwa ngomdlalo wakhe othi Have you seen Zandile? futhi usumhambise amadolobha omhlaba anjenge-Edinburgh, London, Basel, Zurich, Chicago, neTennessee.

Waqala umkhankaso wokushicilela izincwadi zawo ngendlela efundwa ngabantu abangaboni emehlweni i-braile, kanti ezinye seziqoshwa zibe ngama-vidiyo ukuze nabantu abakhuluma ngolimi lwezandla bazithokozele. Wabuye wethula incwadi yakhe  ethi Nozincwadi, Mother of Books, ngo-2023, eyaqoshelwa ukuba ifundwe abakhuluma ngezandla, njengoba baqale bayikhipha nge-braile ngo-2021.