U-Enhle Mbali kwabamele elakuleli kowezindondo
U-ENHLE Mbali ngomunye wosaziwayo abaqokwe kuma-African Movie Academy Awards aseNigeria ngenyanga ezayo Isithombe: Instagram
ABALINGISI bodumo emidlalweni yakuleli uMbalenhle "Enhle Mbali" Mlotshwa noZolisa Xaluva, bayingxenye yamaciko amele iNingizimu Afrika kuma-20th Africa Movie Academy Awards (AMAA) ngoNovemba 2, eBalmoral Centre, e-Ikeja, eNigeria.
U-Enhle Mbali uqokwe emnxeni weBest Supporting Actress ngendawo ayilingisa efilimini kaJahmil X.T Qubeka esihloko sithi The Queenstown Kings.
Le ntokazi eyaduma ngokulingisa kwiTshisa, idlana imilala noMeg Otanwa, Elsie Chidera Abang, Bekunmi Oluwashina, Somkele Iyamah-Idhalamah, Chioma Akpotha noTessa Twala.
UZolisa ungene emkhakheni weBest Actor in A Leading Role ngokudlala indawo eqavile kule filimu.
UZolisa uqhathwe noGabriel Afolayan, Duncan Mungai, Nenesenor Abloso, Bucci Franklyn, Femi Jacobs noChidi Mokeme.
Imizamo yokuthola ukuphawula kukaZolisa no-Enhle Mbali ayiphumelelanga kwaze kwashaya isikhathi sokushicilela.
Abanye abaqokwe ngokulingisa kwiThe Queenstown Kings ngoTessa Twala, Likhona Mgali noSandile Mahlangu.
NgoNovemba 1 kuzobuye kubungazwe izingwazi ezibambe elikhulu iqhaza kule ndima yamafilimu.
