Ona-12 kwabaqokwe emikhakheni yezokulingisa yamaSabela

KUFAKAZELEKE isisho sesiZulu esithi "umthente uhlaba usamila", kuvela igama likaMangaliso Aluta Mthembu, ohlwini lwabalingisi abaqokwe komunye wemikhakha yomncintiswano wezindondo zezokulingisa, amaSimon Mabhhunu Sabela KZN Film and Television Awards, azobe enziwa ihlandla lesi-12 kulo nyaka.

Igama likaMangaliso (12) waseBallito, enyakatho yeTheku, livele emkhakheni we-Best Newcomer Actress, ngendawo ka-Angie ayilingisa emdlalweni wakwiShowmax i-One Weeks, obhalwe wumakadebona wezokubhala imidlalo yethelevishini, uChris Q. Radebe.

Lokhu kuvele emcimbini wokwethula uhla lwamaciko aqokwe emikhakheni ewu-24 yezokulingisa, obuseHilton Hotel, eThekwini, lapho kwethulwe khona nesiqubulo salo nyaka salo mcimbi esithi Africa’s Champions of Storytelling: From Piers to Pages.

Le ntombazanyane efunda uGrade 7 eReddam House College khona eBallito, ibihamba nonina kulo mcimbi uNksz Zama Kheswa, kanti emkhakheni wayo iqhathwe nabalingisi bomdlalo othi Sent; o-Avela Cele noDineo Nxumalo. 

Ixoxa neSolezwe ngemuva kokuvela kwalezi zindaba, ithe lokhu kusho lukhulu kuyona ikakhulu njengoba iseyintsha endimeni futhi lo mdlalo eqokelwe ukulungisa kuwona bekungokokuqala ilingisa, okukhombisa ukuthi imisebenzi yayo iyabonakala.

“Ngibonga kakhulu kubona bonke abalingisi abadala engisebenze nabo ikakhulu ngoba bekungelula kodwa bangibekezelela nalapho ebengibuye ngibe nenkinga khona yokukhohlwa obekumele ngikwenze. Bekuphoqa ukuthi sisebenze isikhathi eside kunesilindelekile ukuze umsebenzi wethu wenzeke ngendlela efanele,” usho kanje.

Unina uNksz Kheswa naye uthe kuyamjabulisa ukubona indodakazi yakhe, okuwukuphela kwayo, ilokhu idlondlobala njalo ngomsebenzi omuhle ewenzayo wokulingisa, okulokhu kuqhubeka kuthela izithelo, njengoba ngaphandle kokulingisa, sekuke kwenzeka kaningi ukuthi athintwe yizinkampani ezifuna ukusebenza nayo ukumaketha imikhiqizo yazo.

Eminye imikhakha ebhekwe kakhulu ngeye-Best Actor TV, okuqokwe kuwona uKwenzokuhle Ngcobo weScandal, uMelusi Yeni noHerald Khumalo beSmoke and Mirrors. Kwi-Best Actress TV kuqokwe kuNelisiwe Sibiya weThonga, Nombulelo Mhlongo weScandal noNqobile Magwaza weSmoke and Mirrors. Kwi-Best Director kuqokwe uMark Engels weMasinga: The Calling, Mohlaba John Maphakela weThandile, Mthunzi Dubazana woMjolo: There Is No Cure noRyan Kruger weStreet Trash. 

Kwi-Best Newcomer Actor kukhona u-Andile Zamokuhle Mtambo woZalo, Kaveshen Govinsamy weLocked Down noSipho Luthuli we-A Wesley South African Christmas. Kwi-Best Use of KZN As Filming Location kubambene iDisaster Holiday eqoshwa yi-Burnt Onion Productions, A Wesley South African Christimas ye-OCTET Productions ne-Real Housewives of Durban S4 ye-Let It Rain Films.

Eminye imikhakha ekhona ngowe-Best Use of Cinematography, Best Production Design, Best Documentary Short Film, Best Documentary Feature Film, Best Supporting Actor TV, Best Supporting Actress TV, Best TV Production, Best Actor Film, Best Actress Film, Best Screenplay. Best Student Film, Best Short Film, Best isiZulu Film, nozobe uqala ukuba khona nonyaka we-Best Pan African Film.

USihlalo webhodi leKZN Tourism and Film Authority, uDkt Sibusiso Ndebele, uthe bajabule ngokuthi balokhu beqhubeka nalo mcimbi obamba iqhaza ukuthuthukisa ikhono lamaciko asesifundazweni futhi wazibophezela ukuthi bazoqhubeka benze lokho ukusiza amaciko akwazi ukukhula nokuthuthukisa imboni yezokulingisa nezokuvakasha KwaZulu-Natal.

Umcimbi woklomelisa abanqobile nonyaka uzoba ngoJulayi 19, endaweni esazomenyezelwa khona lapha eThekwini.