Lesi siteshi sinemiklomelo yokuqhakambisa abesifazane abenza kahle emikhakheni ehlukene, amaGagasi FM Shero Awards.
NoMsombuluko kuqalile ukumemezela abanqobile emikhakheni ehlukene okuyoze kusongwe ngoLwesihlanu lapho sekumenyezelwa odle iMama Mary Twala Award, ozonikezwa obahlule kuyo yonke iminxa isihlanganisiwe.
UMary Twala, owayenguqolothakamango wezokulingisa, ushone ngoJulayi kulo nyaka emuva kokugula.
Phambilini lo mklomelo uke waqanjwa ngoQueen Nandi, Albertina Sisulu noWinnie Madikizela-Mandela.
Kungokwesine le miklomelo ikhona futhi ngenxa kathaqa, lesi siteshi sikhethe ukuyimemezela emoyeni singawusingathi umcimbi.
Izolo kumenyezelwe abanqobe eminxeni emibili. UNomfundo Mcoyi udle umhlanganiso emunxeni weSocial Entrepreneurship noMandy Zulutrash onqobe emunxeni weCreative Arts Category.
Namhlanje ohlelweni iMid-Morning Hangout kuzomenyezelwa abanqobe kwiCommunity Leadership nakwiPublic Service. Kusasa kwiNoma Yini, kuzomenyezelwa abanqobe kwi-Education kuthi ngoLwesine kube yiScience and Technology.
Ngalo uLwesine iThat Drive izomemezela onqobe kwiSports ne-Entertainment and Music. Indaba izolandela nokumemezela ophumelele kwiBig Business Professional ne-Enterprise (Small Business).
NgoLwesihlanu ekuseni onqobe umklomelo omkhulu iMama Mary Twala uzomenyezelwa ohlelweni iThe Uprising bese kuthi iKZN Ambassador imenyezelwe kwiNoma Yini.