IQEMBU laseNewcastle, iNgqayizivele Amazulu Ngoma Dancers lidle umhlanganiso emunxeni weNdlamu, emqhudelwaneni wengoma yasePlayhouse obusenkundleni yezemidlalo iCurries Fountain, eThekwini, ngoMgqibelo.
Ingqayizivele yiqembu eselingumakadebona kule ndima. Lasungulwa nguthisha osalihola uNA Mahlaba ngo-1985. Seliwole inqwaba yemiklomelo futhi selizungeze umhlaba njengoba selibuya naseJapan.
Emkhakheni wendlamu, iNgqayizivele iqwaqwade emakhanda iKangaroo noSizweni Theatre Production. Kwisigekle kuhambe phambili, uBuhle Bomkhambathi, kwalandela oMama Boxolo neShosholoza.
Emkhakheni owaziwa ngeNgoma Sikhuze, kuqengqeleze phambili iMashangane, yalandelwa yiFu eLimnyama naMaqhawe alale isithathu. Emunxeni woMzansi kuhlabane iZulu Warriors, iNgwenya Productions iphume isibili, iNsika Ye-Afrika yalala isithathu. KwiNgoma Yezintombi kuhambe phambili, iZintombi Zosizo, kweza iKusasa eLihle, kwathi iMtimande yaphuma isithathu. Engomeni Yezinsizwa kuwine oFeleba, behlula uMoya oBandayo naMajuba aDlukhethe.
KuShameni kuphumelele iShanela, yalandelwa uShikishi noMkholombe iNdlavini ingene isithathu.
Uhlelo lomcimbi beluphethwe ngobuciko wumsakazi woKhozi FM uNgizwe ‘Zulu Charmer’ Mchunu noMdu ‘Inkonyane Yamaphephethe’ Jali. Ethimbeni lamajaji bekukhona ingwazi ye-world music uMbuso Khoza nenkakha yomculo kamaskandi uMaureen Nhlebela woSenzeni. Ezicukuthwaneni ebezihambele lo mcimbi kubalwa iNhloko enguMqondisi wezobuCiko ePlayhouse uLinda Bukhosini, iJaji laseNkantolo eNkulu yaseMgungundlovu * -Isaac Madondo, umholi womphakathi uMjaphani Mkhize, abaculi bakamaskandi uQalindaba Mkhize wodumo lwengoma ethi No Enemy Permanent nozakwabo uGadla Nxumalo osanda kukhipha iCD ethi Iphakwelaphi, abalingisi boZalo uBongani Mbatha nomsakazi woKhozi FM uVukile Nongcebo McKenzie othe ubeqala ukuhambela umqhudelwano wengoma futhi naye ubeyibhikla. Lo msakazi usezokwethula uhlelo lwasekuseni iVuka Mzansi Breakfast Show noSgqemeza.