KUBEKWE isamba sikaR100 000 esizotholwa yiciko elizodla umhlanganiso emqhudelwaneni kazwelonke okuzodliwana kuwo imilala ngohlelo lwezobuchwepheshe, iProject Perfomer National Online Lockdown Competition kusukela ngoJulayi 2020.
Ngokusho kwesitatimende esithunyelelwe imithombo yezindaba ngabeProject Perfomer, ingxenye yenzuzo ezotholakala ngalo mncintiswano izoxhasa isikhwama iThe Theatre Benevolent Fund.
Umqondisi weProject Perfomer, uShylo Pereira, uthe lolu hlelo lungaphezu komncintiswano.
"Lokhu ukuhlanganisa ndawonye amaciko akhokhelwayo nasafufusa, ukuba akhulume ngezwi elilodwa elikhulu futhi akhombise izwe lethu nomhlaba wonke ukuthi ezokungcebeleka nemboni yezobuciko anendaba ngalesi sikhathi futhi sizobhukula, sinqobe kumnyama kubomvu," kuchaza uShylo.
IProject Perfomer National Online Lockdown Competition ivuleleke kuwo wonke amaciko asakhasa futhi ayoyonke imikhakha okubalwa kuyo ukudansa, ukucula nokulingisa.
Imingenelo yalo mqhudelwano ivulwe kuze kushaye usuku lokuvalwa okunguJulayi 17, 2020 futhi kubekwe indathane yemiklomelo eyisamba sikaR100 000.
"Siyaziqhenya ngokubambisana namajaji angu45 asezingeni likazwelonke nelo mhlaba, okuyiwo azihlulela emzuliswaneni wamanqamu, okubalwa nokukhetha umpetha ozobe ewashaye emakhanda wonke amaciko azobe engenelile," kusho uShylo.
Phakathi kwamajaji azobe ebambe iqhaza kubalwa uMaps Maponyane, Steaven Stead, Samantha Peo, Jono Johanssen, Lelo Ramasimong noBernard Kruger.
Emunxeni wokucula kuzobe kuqhudelwana ngaphansi kwale mikhakha: Musical Theatre/Broadway Pop/Contemporary, kowokulingisa kuzobe kuyile mikhakha: Monologue/Doulogue yanoma yisiphi isikhangiso sethelevishini esingeqile emizuzwini emibili, emidansweni kuzobe kudingeka noma yimuphi umuntu azisungulele wona kanti ezinsimbini zomculo kudingeka ezokudlala iClassical Contemporary.
Ukuze ubambe iqhaza kulo mqhudelwano kuzodingeka ungene kule-website:www.projectperfomer.co.za ukuze uthole imininingwane egcwele nemininingwane yokukhokha imali yokungenela ebhange.
Uma usukhokhile uyobe sewuthumela ubufakazi [email protected] noma ku-067 244 0313.
Ungangena nasekhasini likaFacebook elibhalwe ukuthi -shylopereiraSA.
Kwi-video ozoyithumela kudingeka ucacise amagama akho aphelele, iminyaka yobudala, isifundazwe okuso negama lesikole (uma usafunda). Uqinisekise ukuthi i-video yakho ayeqi emizuzwini ewu-2.5, ngaphandle kwesikhangiso sethelevishini.
Le mizuzu njalo ayihlangene nokuzethula. I-video uyithumela nge-email ku: [email protected] noma ngoWhatsApp ku067 244 0313.
Izinsuku ezisemqoka yilezi: Usuku lokuvala okunguJulayi 17, elokumenyezelwa kwabadlulele emzuliswaneni owandulela owamanqamu ngoJulayi 24, elokumenyezelwa kwabadlulele emzuliswaneni wamanqamu ngoJulayi 31 bese kuba elokumenyezelwa kwabahlabane ngo-Agasti 14.
Eminye imiklomelo ibandakanya nokuqeqeshwa ngongoti kule mikhakha, umfundaze wokufunda ngonyaka ozayo, ukuyongcebeleka.
Ngeminye imininingwane ungangena kuleli khasi likaFacebook: Group Project Perfomer National Online Lockdown Competition neleThe Project Perfomer.