LIGQABUKILE igoda phakathi kwesilomo somsakazi woKhozi FM osanda kubuyiselwa emsebenzini uNgizwe “Zulu Charmer” Mchunu nonkosikazi wakhe wesithathu ongumculi uNqobile “Floda” Mthimkhulu (23).
Lokhu kuqinisekiswe nguye uqobo uFloda ngesikhathi ethintwa yiSolezwe ngeSonto.
Uthe ucu alusalingani ekubeni bebegcagce ngo-2016. UFloda akazimisele ukuveza imbangela yokuhlukana kwabo.
“Yini nithanda ukungifonela ningibuze ngoNgizwe?” kubuza uFloda ngokucasuka.
Uthe umbhalo awufake ku-Instagram kuleli sonto othi: “I left that nigga...He was no fun” ubengakhulumi ngoNgizwe, ubezibhalela izinhlamvu zeculo.
Lo mbhalo ubuhambisana nesithombe sakhe esimveza ehleli kusofa eflathele egqoke idilozi elinomsweswana wentambo elibizwa ngeg-string, izinqe zihlezi obala.
Ebuzwa uFloda ngombhalo awufake ngenyanga edlule othi akanamuntu athandana naye, uzinakele izindaba zakhe, akazange aphumele obala ukuthi wayeqondeni.
Uthe angakusho ukuthi izinsolo zokuhlukana kwabo esezisabalele ezinkundleni zokuxhumana, ziliqiniso.
Uveze ukuthi uxinwe umkhuhlane ngakho ngeke akwazi ukwanda ngenkulumo.
Isolezwe ngeSonto like labika ngoSepthemba ngezinsolo zokubuyisana kwalezi zithandani ngemuva kokuthi zibonakale zipepenyeka ndawonye eMkhosini woMhlanga, KwaNongoma.
Ukubonakala kwabo bobabili kwashaqa abaningi ngoba uFloda wayesanda kubhala ku-Instagram ukuthi uNgizwe uyamshaya. Abaningi babezitshela ukuthi kuphelile ngesikhathi uFloda ethi uNgizwe wamshaya wacishe wambulala.
Ebuzwa uNgizwe ngezinsolo zokwaliwa uFloda, ubhoke ngolaka wathi: “Utheni uFloda? Ayikho leyo nto. Ngicela ningalokhu ningibuza umbhedo.” Ujike wavala ucingo emva kwalokho.