SIBUSISO MDLALOSE
KUNGAKAPHOLI maseko echithwe yiKaizer Chiefs, uPhilani Zulu usezitholele ikhaya elisha kuMaZulu FC okuvela ukuthi usesayine kuwona ngaphambi kokuqala kwesizini ka-2021/2022 yeDStv Premiership.
UZulu (28), waseMgungundlovu, ubengomunye wabadlali abayisikhombisa abafakwe ohlwini lwabachithwayo eqenjini laseSoweto.
Abanye nguWillard Katsande, Kgotso Moleko noSiphosakhe Ntitya-Ntiya.
Ngokuthola komthombo weSolezwe ongashayi eceleni, AmaZulu aseqedile ngokusayinisa uZulu odlala emuva ohlangothini lwesobunxele.
Kubukeka ezovala isikhala sikaSibusiso Mabiliso osanda kujoyina iChiefs esuka kulo uSuthu.
Kuvela eyokusayina kukaZulu nje, Isolezwe ngoMgqibelo lisanda kuveza eyokusayinwa kukaTercious Malepe naye oyisitobha.
UMalepe ubengukaputeni weqembu lesizwe lika-Under 23 ebelibambe iqhaza kuma-Olympic Games eTokyo, eJapan.
UMaelepe ufika kwelaseMbelebeleni ngemuva kokuhlukana neqembu lase-Ukraine, i-FC Myanai.
USuthu into ecokeme ngesizini edlule luqeda endaweni yesibili kwi-log yePremiership.
Kubukeka lwenza konke okusemandleni ukwakha inqanawe yesikwati kwazise luvivela ukuyoyibamba kweyeCaf Champions League ngesizini ezokwethwasa.
Kuputshuka indaba kaZulu noMalepe nje, leli qembu selivele lisayinise abadlali ababili abasuka kwiMaritzburg United, uKeegan Buchanan noMxolisi Kunene.
Ethintwa uBrilliant Mkhathini, oyisikhulumi saMaZulu, uthe: “Okwamanje ngeke ngikwazi ukuphawula ngalokho, ngoba njengeqembu asikamemezeli ngokusemthethweni ngabadlali esibasayinisayo.
“Sizomezezela ngokusemthethweni maduze ngezinhlelo zethu zangesizini ezayo.”