ILINDELWE ngabomvu imidlalo yamaqoqo ye-UEFA Champions League njengoba amanye amaqembu athathwa njengamakhulu ezogijimisana namhlanje, ukuze aziphendlele indlela yokunqoba lesi sicoco esikhulukazi e-Europe.
Phakathi kwamaqembu abalwa njengezimfivilithi kukhona iReal Madrid eqophe umlando ithatha lesi sicoco amahlandla amathathu elandelana kulama sizini adlule; (2015/16) (2016/17) (2017/18). Leli qembu lithenge u-Eden Hazard okulindeleke ukuthi abambe iqhaza elikhulu kuleli qembu.
ILiverpool evikela lendebe, ivule ngenduku ishaywa yiNapoli eSan Paolo Stadium izolo ebusuku. Womabili lamaqembu abalwa njengezimfivilithi njengoba ethenge abadlali abasha aphinde ayiqala kahle isizini. ILiverpool ishaye iSpurs ngo 2-0 kowamanqamu ngesizini ephelile kwazise yaikade ishaywe iReal Madrid kowamanqamu ngaphambi kwesizini edlule.
IJuventus izokwethembela kwisilomo somgadli uRonaldo ukuthi sibahambise ibanga elide kulomncintiswano kwazise benze ushintsho olukhulu ethimbeni labaqeqeshi ngenhloso yokudlala ibhola elihle elizobawinisa lendebe baphinde bathenga nabadlali abasha. IJuventus ilande uMaurizio Sarro odume ngokudlalisa ibhola elinenkosi ophakathi, leli elifunwa abalandeli beJuventus njengoba behhewule uMassimiliano Allegri ngokudlala ibhola elimile ngesizini ephelile.
IBarcelona, eqale ngegiya eliphansi idlala ngokulingana izolo ibhekene neBorussia Dortmund, izoqhuba umkhankaso wayo wokufuna lesicoco njengoba yagcina ukusinqoba ngo-2015.
IManchester City, engenye yamaqembu asekubeke obala ukuthi afuna lesi sicoco izotholana neShakthar Donetsk Ngolwesithathu ebusuku ekuhambeni. ICity eholwa uPep Guardiola osenqobe lesi sicoco kabili esaqeqesha iBarcelona, ithenge uRodri waseSpain noJoao Cancelo kwi-Juventus njengoba ifuna ukunqoba lendebe okokuqala emlandweni weqembu kwazise ikhishwe yiSpurs ngesizini edlule.
Phakathi kwamaqembu athathwa njengalawo angathusa abaningi kukhona i-Inter Milan eqeqeshwa u-Antonio Conte ebhekwe ngabomvu kwazise iyiqale isizini iqhwakela esicongweni kwiSerie A, iBayern Munich eyagcina ukunqoba lesi sicoco ngo-2013 kanye ne-Athletico Madrid esihlulwe kabili kweyamanqamu (2013/14 : 2015/16). I-Inter ngoLwesithathu iyiqale kabi iChampions League idlala ngokulingana neqembu obekulindeleke ukuthi ilishaye iSlavia Praha.
IPSG ibukeka ingazama kulesizini njengoba izobhekana namaqembu angathusi kakhulu kweyamaqoqo okukhona kuwo iGalatasaray, iClub Brugge neReal Madrid. IBrugge kaPercy Tau edlule kunzima kweyokuhlungela amaqoqo, izotholana neGalatasaray namhlanje ebusuku eJan Breydelstadion.
Isizini ephelile yeChampions League ikhombisile ukuthi akumele athathwe kancane amaqembu njengoba i-Ajax Amsterdam, Tottenham Hotspurs neFC Porto benze ezibukwayo begudluza amaqembu amakhulu. I-Ajax idayise izethenjwa ezimbili uFrenkie De Jong noDe Ligt, okuzoyenza ihluke eqenjini langesizini edlule elikhishwe kabuhlungu yiTottenham kumasemi-finals. Nokho leli qembu libukeka lisaqinile njengoba livule i-UCL ngewini ka 3-0 libhekene neLille OSC yaseFrance