AKAGCINANGA uMwape “Black Panther” Musonda ngokuvikisa iBlack Leopards izembe nokwenza i-Orlando Pirates izisole ngokumchitha kodwa ngokumuka neLesley Manyathela Golden Boot ushintshe nomlando wamagoli kwiPremier Soccer League (PSL).
UMusonda, ofike eNingizimu Afrika ezodlalela iPirates ngo-2015 esuka kwiZanaco FC yaseZambia, uzoya emcimbini wemiklomelo yabenze kahle kwiPSL ngesizini ka-2018/2019 eqholosha kwazise akabangiswa emklomelweni wamagoli.
Umcimbi useNkosi Albert Luthuli International Convention Centre namuhla ngo-7 ebusuku.
UMusonda, okunguye yedwa okusongwe isizini eshaye ihat-trick kwiPremiership, uqede eqhwakele ngamagoli angu-16 eshiya uGift Motupa, Tshegofatso Mabaso noThembinkosi Lorch abamlandelayo benamagoli ayisishiyagalolunye ngamunye.
Ngokwesibili uMusonda eqeda isizini yaseMzansi ehamba phambili ngamagoli kwazise nangesizini edlule ushaye angu-15 afake iLeopards kwiPremeirship.
Ngamagoli akhe angu-16 ngo-2018/2019 uMusonda uphazamise ukucanasa kwabadlali baseMzansi kwazise bese kungamasizini amabili elandelana beshintshana ngawo uLebogang Manyama noPercy Tau noRodney Ramagalela okuseyibo bodwa abaqede belingena ngamagoli.
UMusonda ulandela uCollins Mbesuma wangakubo eZambia ohlwini lwabadlali bangaphandle ukunqoba isicathulo segolide.
UMbesuma nguye yedwa osawunqobe kabili lo mklomelo kwiPSL - ngo-2004/2005 nango-2015/2016.
Ngaphambi kwalokho abadlali baseNingizimu Afrika bebekade futhi bezenzela kulo mklomelo uSiyabonga Nomvethe, Katlego Mashego, Bernad Parker noMoeketsi Sekola beshintshana ngawo phakathi kuka-2011/2012 kuya ku-2014/2015.
Empeleni ngo-2013/2014 uParker weKaizer Chiefs uqophe irekhodi elingakephulwa lokumuka nesicathulo segolide ngamagoli amancane emlandweni, ngawu-10.
UMbesuma, ophethe irekhodi lamaningi ngawu-25 naye awashayele iChiefs ngo-2004/2005, ubalwa kubadlali abane kuphela ukufinyelela emagolini angu-20.
Abanye nguWilfred Mugeyi waseZimbabwe ngo-1996/1997 oshayele iBush Bucks angu-22, Pollen Ndlanya ngo-1998/1999 onike iChiefs angu-21, uNomvete ngo-2011/2012 obhaxabulele iMoroka Swallows angu-20.
Amafolosi aseNingizimu Afrika yiwo ahamba phambili ngokudla lo mklomelo kwazise asemuke nawo amahlandla angu-14. Alandelwa yiZambia yona esiwuthathe kayisithupha okubalwa kubo uChris Katongo, James Chamanga, Dennis Lota, Mbesuma (kabili) noMusonda. Isiyalala izintuli imoto eyabekwa njengomklomelo walowo oyofinyelela emagolini angu-25 kaMbesuma.