UMGADLI weMamelodi Sundowns waseBrazil, u-Arthur Sales, uthumele isixwayiso esishubile emaqenjini esigaba esikhulu sePremier Soccer League (PSL) ngokuzibamba ziqine ngokuphindiwe njengoba kuzoqala isizini entsha yeBetway Premiership.
ISundowns isematheni umhlaba wonke kulezi zinsuku kulandela ubuqhawe ebukhombise idlala ingcwenga yebhola kwiFifa Club World Cup yize ikhishwe kweyamaqoqo.
Ku-Group F, iSundowns ebiboshelwe kuwona ne-Ulsan HD yaseSouth Korea, Borussia Dortmund yaseGermany neFluminense FC yaseBrazil, inqobe owodwa yashaywa komunye yase icazelanga ngamaphuzu komunye owodwa.
IDortmund edume umhlaba wonke nge-UEFA Champions League inqobe ngo 4-3 kwiSundowns, kwathi iFluminense yabambana nayo ngo 0-0.
Sekungumlando ukuthi iDortmund neFluminense ababhinciselwe nxanye yiSundowns, bakuma-quarterfinal alo mqhudelwano oqhubekayo e-United States of America (USA) kuze kube uJulayi 13.
Kungenxa yalo mqhudelwano uSales ebona iSundowns ingeke isabambeka kusukela manje.
USales (22) ofike kwiSundowns ngoJulayi nyakenye, esuka kwiLommel SK yaseBelgium, uyishayele amagoli ayisishiyagalolunye, wakhela ozakwabo angu-10 emidlalweni engu-42 ngokwahlukana kwemiqhudelwano.
“Nakuba ngilimale amahlandla amabili ahlukene, ngaphinde ngaphoxwa wukushaywa kowamanqamu weCaf Champions League kodwa isizini yami yokuqala eNingizimu Afrika ngingayichaza njengebe yimpumelelo,” kusho uSales kwabezindaba.
“Kuyabaphoqa ukuthi bazibambe ziqine nakakhulu abazimisele ngokuma phambi kwethu kwiligi nakweminye imiqhudelwano njengoba kuzoqala isizini.
“Sithole izifundo eziningi ezinzima e-USA. Namanje kusakhulunywa ngendlela esidlale ngayo okuyinto esikhuthazayo. Njengoba kuzoqala isizini, angingabazi ukuthi sizobe siqine kakhulu kunangedlule. Emaqenjini afisa ukugudluza iSundowns esicongweni kusemqoka ukuthi akuqonde ukuthi azodinga wonke amandla anawo nangaphezulu mhlawumbe kuphinde kungeneli.
“Sikhuthazekile singabadlali futhi sifuna ukwenza kangcono kunakuqala. Siphoxekile ngendlela okwenzeke ngayo kwiChampions League.
“Nakhona kwi-Club World Cup asizange sikwenze ebesikuhlelile ngakho-ke sifuna ukukhiphela isibhongo kwawe-PSL esizohlangana nawo ngesizini ezayo,” kusho uSales.