URiveiro ulibheke ngabomvu irekhodi likaBaxter
UJOSE Riveiro we-Orlando Pirates usebheke ukuphula irekhodi lomqeqeshi wakudala weKaizer Chiefs uSturat Baxter ngaphambi kokuvalelisa ekupheleni kwesizini
Image: ITUMELENG ENGLISH
ISITHANDWA somqeqeshi oshiyayo kwi-Orlando Pirates, uJose Riveiro, silibheke ngabomvu irekhodi lokuba yingqwele yemidlalo yabakhaya baseSoweto njengoba sinethuba ngowamanqamu weNedbank Cup ngoMgqibelo eMoses Mabhida Stadium, eThekwini.
Kuze kwaba wuMgqibelo odlule uBaxter ezihlalele yedwa esicongweni ngokuba wumqeqeshi onamawini amaningi kunabo bonke emidlalweni ephakathi kweChiefs nePirates kusukela kwasungulwa iPremier Soccer League (PSL) ngo-1996.
Iwini yePirates ebibuya ikade ilandela ngemuva emdlalweni weBetway Premiership ngoMgqibelo e-FNB Stadium, eNasrec ilinganise uRiveiro noBaxter kumawini amahlanu kule ndumezulu yomdlalo odume umhlaba wonke.
Inkundla ivulwe uGlody Lilepo umdlalo usanda kuqala, walinganisa u-Evidence Makgopa ngaphambi kokuthi uRelebohile Mofokeng ashayele isipikili sokugcina.
Kusukela uRiveiro afika eNingizimu Afrika ngo-2022 usewine imidlalo yabakhaya yeligi emihlanu kulandelana okuyinto engakaze yenziwe omunye umqeqeshi kusukela kwasungulwa i-PSL.
Kumqoka ukuqaphela ukuthi emdlalweni wakhe wabakhaya wokuqala wakhala ngaphansi ngo 1-0 iChiefs isaqeqeshwa u-Arthur “10111” Zwane osekuMaZulu FC.
Emlandweni we-PSL akekho umqeqeshi wePirates oseke waphinda iChiefs amahlandla amabili kweyeligi amasizini amabili elandelana ngaphandle kukaRiveiro.
Kusobala-ke nokho ukuthi konke lokhu kuhlabana namarekhodi akwanele kuRiveiro ongazange abafihlele abezindaba abenesithangami nabo ngemuva kowabakhaya ukuthi ukubheke ngabomvu ukuhlala yedwa kumawini ayisithupha emdlalweni walezi zinkunzi zaseSoweto.
“Ngeke sikubalekele ukuthi kunethuba elihle lokuphula irekhodi kodwa okumqoka nokuyikhona esikubeke phambili wukuwinela iPirates isicoco seNedbank Cup ngesonto elizayo,” kusho uRiveiro.
“Uma sesikwenzile lokho sesingaqala-ke sibhiyozele imiklomelo nemihlomulo ehamba ngayodwana ngoba esikuphilelayo yiPirates.
“Ngabe ngisenga ezimithiyo uma ngithi akumnandi ukushaya iChiefs amahlandla amahlanu kulandelana kodwa ngeke kwehle kahle uma singawuqedelanga eThekwini umsebenzi.”
URiveiro odabuka kwelaseSpain ukhumbule ukuthi ngesikhathi eshaywa kowabakhaya wokuqala wabhuqwa ngokuhlulelwa enkundleni izwe lakhe elanqobela kuyona iNdebe yoMhlaba ka-2010.
“Kumnandi ukuqeda ngethuba lerekhodi kwazise ngaqala ngokubhuqwa ngesikhathi ngifika. Yinhle indaba yamarekhodi kodwa akufanele siyivumele isiphazamise ekufezeni izifiso zeqembu,” kusho uRiveiro.
Ngaphambi kokuthi iPirates ibhekane neChiefs ngoMgqibelo eThekwini kumele iqale idlale neLamontville Golden Arrows kusasa ngo7.30 ebusuku eMpumalanga Stadium, eHammarsdale.
Lo mdlalo wawuhlehle ngenxa yokugcwala kwamanzi enkundleni ezinyangeni ezimbalwa ezedlule.
Isiyonke imidlalo yeBetway Premiership elandelayo imi kanje:
Kusasa
Golden Arrows v Orlando Pirates (Mpumalanga Stadium, 7.30pm).
NgoLwesithathu
Mamelodi Sundowns v Chippa United (Loftus Versveld, 7.30pm)