UNabi ushiswe yimibuzo ngeChiefs wavukwa wulaka
UMQEQESHI weKaizer Chiefs uNasreddine Nabi obhokele abezindaba ngolaka
Image: ITUMELENG ENGLISH
UKULINGANISA kweKaizer Chiefs irekhodi elibi lokushaywa imidlalo eminingi kunayo yonke ngesizini (12) kusukela kwasungulwa i-Premier Soccer League (PSL) ngo-1996, kushintshe uNasreddine Nabi owaziwa ngamancoko wabhokela abezindaba ngolaka ebasola ngokungamhloniphi.
Ngemuva komdlalo wabakhaya uNabi ubuzwe esithangamini nabezindaba ukuthi ubona kusamfanele yini ukuqhubeka nokushayela umkhumbi weChiefs njengoba kubukeka sengathi ubheke kumarekhodi angakaze abonakale emlandweni wePSL.
Lo mbuzo uqhamuke ngemuva kokuthi iChiefs ihambe phambili ngegoli likaGlody Lilepo kodwa yagcina ikhale ngaphansi ngo 2-1 wamagoli o-Evidence Makgopa noRelebohile Mofokeng koweBetway Premiership ngoMgqibelo e-FNB Stadium, eNasrec.
Nakuba lo mqeqeshi waseTunisia ebelokhu ekuvezile ukuthi isivumelwano sakhe nabaphathi beChiefs kwakuwukuthi isizini yokuqala izofana nesisekelo kodwa irekhodi lakhe kwisizini yokuqala lingase limholele kwephoxa kunawo wonke kusukela kwaqala i-PSL.
Induku yePirates ngoMgqibelo bekungeka-12 kule sizini kwiChiefs emidlalweni engu-26 asawine kuyona eyisishiyagalombili kuphela.
Esikhundleni samaphuzu angu-78 iChiefs isaqoqe angu-30 kule sizini njengoba isalelwe yimidlalo emibili ukuthi iyisonge.
Ukulinganisa irekhodi elibi lokushaywa imidlalo engu-12 kwisizini elabekwa uCavin Johnson ngesizini edlule, kubeke uNabi engcupheni yokuba wumqeqeshi owayenzela phansi kunabo bonke ngokwamaphuzu kwiligi nangokwemidlalo abashaywe kuyona kusukela ngo-1996.
Umbuzo ngalokhu awuzange uhlale kahle kuNabi oweqe ngisho utolika wakhe uCedric Kaze wazikhulumela ngaphambi kokusukuma ashiye isithangami nabezindaba.
“Ngokomthetho akufanele ngabe ngiyawuphendula lo mbuzo kodwa ngoba ngibona kufanele ngizophendula,” kusho uNabi ebuzwa ukuthi ubona kumfanele yini ukuhlala kwiChiefs.
“Akuwena onqumayo ukuthi ngiyahamba noma ngiyahlala ngakho-ke angiqondi ukuthi yini kube uwena obuza lo mbuzo? Angitatazeli ngomsebenzi wami.
“Ngineminyaka ngenza lo msebenzi. Yebo angeneme ngezinto ezithile eqenjini lami kodwa lokhu akukuniki igunya lokungibuza izinto ongahlangene nazo.
“Okwakho ukungibuza ngokwenzeke enkundleni hhayi ngezivumelwano zami nabaphathi bami. Le nto oyenzayo ikhombisa ukungangihloniphi ekubeni mina ngiyanihlonipha nonke,” kusho uNabi ngolaka.
Nakuba uNabi engazange agxile kodwa ukhale ngephenathi obekufanele banikwe yona yize namaphutha abadlali bakhe abawenze ngabodwana eyiphile iPirates la maphuzu amathathu.
Amakhosi azothola ingqayizivele yethuba lokuzibuyisa zishisa izinduku kowamanqamu weNedbank Cup ngoMgqibelo ngo-3.30 ntambama eMoses Mabhida Stadium, eThekwini.