UMkhize uthuswa ukukhula mawala kweKhabba Cup
OMPETHA beKabba Cup, i-Eastern Cape XI, bejabulela ukudla kwabo umhlanganiso obuphelezelwa yisheke lika-R120 000
Image: SITHUNYELWE
SISAMETHUSA namanje isivinini okukhula ngaso iKhabba Cup umsunguli wayo, uManqoba Mkhize, owaduma kwiLamontville Golden Arrows.
UMkhize onomlando nakwiKaizer Chiefs uphinde wakucacisa ukuthi umqhudelwano wakhe uya ngokuya uphenduka eminye yemikhulukazi eNingizimu Afrika ikakhulukazi kulaba abalambele ithalente elingaziwa.
Kulo nyaka kube yi-Eastern Cape XI yase-Eastern Cape, egoduke nesheke lika-R120 000 ngokudla umhlanganiso kulandela ukuguqisa kwayo ngo 2-0 iLagos FC yasoLundi, kowamanqamu ngeSonto, eKing Zwelithini Stadium, eMlaza.
ILagos elale isibili ihambe nomthobanhliziyo wesheke lika-R50 000 nezindondo zesiliva.
Yize lo mqhudelwano usukhiqize abadlali abafana noYanela Mbuthuma osesikwatini seBafana Bafana esidlala neMozambique namuhla kodwa uMkhize usalokhu ethuke njalo uma ebuka isivinini okukhula ngaso iKhabba Cup ebigijinwe okwehlandla lesine ngempelasonto.
“Namanje kusangethusa ukubona izinkumbi zabantu zithutheleka enkundleni (King Zwelithini Stadium) ngenhloso yokuzozibonela ngamehlo isihlabani kumbe isilomo esilandelayo kunobhutshuzwayo,” kusho uMkhize ngemuva kokuqukula kwe-Eastern Cape.
“Indlela iKhabba Cup ekhula ngayo minyaka yonke iyangithusa yize ngingeke ngiyifihle injabulo yami ngokubona leli phupho lifezeka. Okwakumqoka kimina ukusondeza amathuba kubafana abebengeke babenalo.
“Lokhu kwenzeka wonke amasizini kodwa okusemqoka ukungakukhohlwa yindima edlalwa abaxhasi balo mqhudelwano bonke ngokwahlukana kwabo. Ngaphandle kwabaxhasi (Hollywoodbets) izinto ngeke zenzeke ngale ndlela ezenzeka ngayo.
“Okubonakale kulo mqhudelwano ukuthi ithalente likhona futhi liningi eNingizimu Afrika,” kusho uMkhize ekhombisa izimpawu zokwaneliseka.
Umqeqeshi we-Easten Cape uSihle Makhanya uthe: “Okungijabulisa kakhulu ukuthi sidle umhlanganiso nje, cishe bonke abadlali bami bebeqala ukuthola ithuba elifana naleli abalinikwe yiKhabba Cup.
Umdlali ovelele: Lundi Mphahla (Eastern Cape XI)
Okhonye ngamagoli: Lundi Mpahla (Eastern Cape XI)
Umqeqeshi ovelele: Sihle Makhanya (Eastern Cape XI)
Isitobha esivelele: Thando Mbatha (Lagos FC)
Injini evelele: Aviwe Blaai (Eastern Cape XI)
Unozinti ovelele: Ayanda Ngwenya (Eastern Cape XI)