Umdlali we-Arrows ophukile engozini ye-ambulensi
UVELEMSENI Ndwandwe weGolden Arrows ophuke enkundleni waphinda waba sengozini yomgwaqo ne-ambulensi
Image: BACKPAGEPIX
UMDLALI weLamontville Golden Arrows, uVelemseni Ndwandwe, uvelelwe yibhadi kabili kulandelana eduze ngesikhathi ephuka fahla emdlalweni weBetway Premiership neSekhukhune United ngaphambi kokuba sengozini ne-ambulensi ebimphuthumisa esibhedlela.
UNdwandwe ongomunye wokaputeni be-Arrows akazange alibone iqembu lakhe linqoba ngo 3-1 kwiSekhukhune emdlalweni weligi obungoMgqibelo ntambama ePrincess Magogo Stadium, KwaMashu.
Esiwombeni sokuqala uNdwandwe udlaliseke kabi kuShaun Mogaila okuphoqe ukuba aphuthunyiswe esibhedlela. UMogaila ukhishwe ngekhadi elibomvu.
Ngesikhathi uNdwandwe ogijima esiswini kwi-Arrows esendleleni ebheke esibhedlela, i-ambulensi abehamba ngayo ivelelwe yingozi yomgwaqo.
Lokhu kuqinisekiswe, uManqoba “TV” Mngqithi, owumqeqeshi we-Arrows ngesikhathi ekhuluma nabezindaba ngemuva kwalo mdlalo odambise uvalo ngezembe kuBafana Bes’thende.
“Nizwile ukuthi kwenzekeni uNdwandwe endleleni ebheke esibhedlela?” Ubuze kanje uMngqithi obephendula umbuzo wabenzindaba ngesimo salo mdlali ophuke esiwombeni sokuqala.
“I-Ambulensi abehanjiswa ngayo esibhedlela ibe sengozini kwalimala abantu. Kuthiwa kukhona abalimele kwi-ambulensi abehamba ngayuo.
“Yena akazange athinteke engozini uma besho yize singakazi ukuthi ukulimala kwakhe kuzomhlalisa isikhathi eisingakanani engadlali,” kusho uMngqithi.
UMogaila olimaze uNdwandwe uhamba icala lokubulala ngokungenhloso kulandela ingozi eyenzeka o-Okthoba nyakenye eGoli okwashona kuyona ingane eneminyaka eyisishiyagalolunye