ISIKHWISHIKHWISHI seMaritzburg United, u-Allan Kateregga, sizimisele ngokushaya izinyoni ezimbili ngetshe elilodwa njengoba sisabolekiswe kwiTeam Of Choice elwisa kwengwe ukuvika izembe.
UKateregga ungowase-Uganda, ufike kuleli ezodlalela iCape Town City eqeqeshwa uBenni McCarthy.
Nokho kuthe ngoJanuwari, iCity yambolekisa kwiMaritzburg izinyanga eziyisithupha. Usephenduke isithandwa sabalandeli. Uma elibamba kukhale igama elithi “Rasta”.
NgoLwesihlanu olwedlule, ushaye amagoli amabili iMaritzburg ishaya iBloemfontein Celtic emdlalweni we-Absa Premiership obuseHarry Gwala Stadium, eMgungundlovu.
UKateregga ube ngumdlali wosuku ovelele kulo mdlalo kwazise ushaye amagoli amabili esuka ebhentshini njengoba engenele uSphesihle Ndlovu ngesiwombe sesibili.
ITeam Of Choice igcine inqoba lo mdlalo ngo 2-1. Ngokusho kukaKateregga engxoxweni naleli phephandaba, uma eqhubeka nokudlala kwiMaritzburg, uzoshaya uzinyoni ezimbili ngetshe elilodwa.
“Uma ngiqhubeka nokudlala kahle, ngizosiza iMaritzburg ivike izembe nokuyongijabulisa kakhulu ngoba leli qembu akulifanele ukuba kule ndawo elikuyona. Ngaphandle nje kwalokho, naseqenjini lesizwe lasekhaya i-Uganda ngizozibekela indawo kwi-Africa Cup of Nations (Afcon), ngoba ngiyazi ithimba labaqeqeshi liyayilandela indlela engidlala ngayo. Konke kodwa lokhu kuzokwenzeka uma ngiqhubeka nokudlala kahle kwiMaritzburg,” kusho uKateregga.
Ebuzwa ukuthi ngabe usazimisele yini ukubuyela kwiCity ekupheleni kwesizini, uKateregga uthe: “Lokho ngeke ngaphawula ngakho ngoba akuncikile kumina. Kuyenzeka uthole ukuthi njengomdlali unesifiso esithize kodwa ngenxa yezinto eziningi eziyimixhantela kugcine kungenzekanga. Okwamanje ngisajabulela ukudlala lapha kwiMaritzburg, okunye ngizokubona ngoJuni."
Emdlalweni olandelayo we-Absa Premiership, iMaritzburg izodlala neHighlands Park ekuhambeni eMakhulong Stadium ngoMgqibelo, ngo-3 ntambama.
“Sidinga inhlanhla kulo mdlalo wethu olandelayo ngoba siyasazi isimo esikusona njengeqembu. Singabadlali siyazi ukuthi konke kuncike kuthina. Ngijabule nokho ngomoya wobunye okhona kuthina singabadlali. Ngibona ukuzwana kuzosilekelela kakhulu kulena esiyilwayo yokuvika izembe,” kubeka uKateregga.