USALE egxeka ukucinana kwemidlalo umqeqeshi weKaizer Chiefs, uGiovanni Solinas, ezakhe zibanjwa yiBaroka kowe-Absa Premiership eNew Peter Mokaba Stadium, eLimpopo, ngoLwesibili ebusuku.
IChiefs ibambane ngo 1-1 neBakgaga emdlalweni ongafinyelelalanga ezingeni ebelikade libhekiwe. Igoli laMakhosi lokulinganisa lishaywe nguSiphiwe Tshabalala kuyi-free kick kanti eleBaroka kube wumkhonto ogwaze ekhaya kaDaniel Cardoso.
Emuva kokuthi iChiefs ishaye into ecokeme ibhudluza iFree State Stars ngo 3-0 koweMTN8 ngempelasonto, bekubhekwe ukuthi iqhubeke nomgqigqo eLimpopo. USolinas akakawini nowodwa umdlalo weligi kwemithathu aseyihlale ebhentshini ewumqeqeshi weChiefs. Udlale ngokulingana neMamelodi Sundowns, wahlulwa yiBidvest Wits njengoba esebanjwa yiBaroka.
Emuva komdlalo neBaroka lo mqeqeshi wase-Italy ukhale ngokusondelana kwemidlalo okuholela ekutheni bangasitholi isikhathi sokudonsa umoya nokufundisa abadlali amaqhinga akhe.
“Kube wumdlalo omuhle, sidlale kahle esiwombeni sokuqala. Besiwuphethe umdlalo. Kujwayelekile ukuthi esiwombeni sesibili kuhlasele ukukhathala. IBaroka ibingadlali ngoMgqibelo, abami abadlali kade bedlala. Bahambe nebanga elide, bangasithola isikhathi sokuphumula nokuziqeqesha. Ekugcineni sikhathalile. Kodwa sidlale kahle. Akulula ukudlala njalo emuva kwezinsuku ezimbili uphinde uhambe. Siwakhile amathuba. Kubi ukuthi asiwuwinanga umdlalo,” kusho uSolinas.
Ukhala ngesikhathi sokuphumula nje uSolinas, kufanele ahole ezakhe babhekise amabombo eMgungundlovu lapho bezobhekana khona neMaritzburg United koweligi, eHarry Gwala Stadium kusasa ngo-8 ebusuku.
“Lolu luhla lwemidlalo olwama-robhothi, akulona olwabantu abaphilayo. Ngoba ngeke kwenzeke ukuthi emuva kwezinsuku ezimbili uyadlala uphinde uhambe amahora amane. Sidlalile ngoMgqibelo asangasithola isikhathi sokubuyisa amandla nokuziqeqesha. Kuyinkinga enkulu. Kodwa-ke yilona uhla lwemidlalo, siyalwemukela. Sekufanele sibheke emdlalweni olandelayo neMaritzburg. Sizokwenza konke okusemandleni ukuthi siwine umdlalo,” kusho uSolinas.
Emidlalweni embalwa uSolinas aseyihlale ebhentshini leChiefs usebhekane nezimo ezehlukane okukhona kuzona ukuphoqwa ngabalandeli ukufaka abadlali abafunwa yibona nokukhipha enkundleni abangasabadingi. Nakuba abadlali okukhona kubona uKabelo Mahlasela kubahlomulisa lokhu kodwa uBernard Parker obeyintandokazi usenuka umzondo kubalandeli baMakhosi. UParker uphinde wahhewulwa ngabalandeli ngesikhathi engena endaweni kaTshabalala ngoLwesibili.
UParker ubhekane nesimo esifanayo behlula i-Ea Lla Koto ngesikhathi engena endaweni kaJoseph Molangoane olimele.
“Ngifuna abalandeli babeseke abadlali ngesikhathi somdlalo, siyabadinga kakhulu. Ngesikhathi kudlalwa akusona isikhathi sokugxeka abadlali. Enkundleni abadlali badinga ukwesekwa. Lowo umlandeli wangempela. Umlandeli woqobo uyabeseka abadlali ngesikhathi somdlalo, uma usuphelile, ngiyavuma usungabehlulela. Kodwa ngesikhathi somdlalo, cha. UParker ungumdlali weKaizer Chiefs, udinga ukwesekwa. Abadlali basebenza kanzima enkudleni yokuziqeqesha, bayawufaka umfutho. Badinga isikhathi sokuziqeqesha ngoba yilapho olungisa khona amaphutha. Manje asinaso isikhathi sokuziqeqesha, sidlala njalo,” kusho uSolinas.
Imidlalo ye-Absa Premiership:
Kusasa ngo-8 ebusuku: Maritzburg United v Kaizer Chiefs (Harry Gwala Stadium)
NgoMgqibelo: Polokwane City v Baroka FC (New Peter Mokaba Stadium, 3pm); Cape Town City v Lamontville Golden Arrows (Cape Town Stadium, 6pm); Bidvest Wits v SuperSport United (Bidvest Stadium, 8.15pm); Chippa United v Black Leopards (Sisa Dukashe Stadium, 8.15pm)
NgeSonto: Bloemfontein Celtic v Orlando Pirates (Free State Stadium, 3pm); AmaZulu v Free State Stars (King Zwelithini Stadium, 3pm)