NAKUBA iBanyana Banyana ingabuyanga nendondo yegolide kwi-2018 Caf African Women Cup of Nations (Awcon) kodwa isilomo esinguThembi Kgatlana sisethubeni elihle lokuhlabana nge-2018 African Women’s Player of the Year.
Lo mklomelo uzokhishwa emcimbini wemiklomelo yeConfederation of African Football eDakar, eSenegal ngoLwesibili ebusuku.
UKgatlana ubanga nezintokazi ezimbili zaseNigeria, u-Asisat Oshoala noFrancisca Ordega, abasize iSuper Falcons yanqoba isicoco sayo sesishiya-galolunye kwi-Awcon ebisingethwe yiGhana ekupheleni konyaka odlule.
Kwabesilisa kubanga uMohamed Salah wase-Egypt nozakwabo kwiLiverpool uSadio Mane waseSenegal noPierre-Emerick Aubameyang we-Arsenal.
U-Oshoala usewudle kathathu umklomelo womdlali wesifazane ovelele e-Afrika kanti ngoLwesibili ucuthule ukuwunqoba okwesine nokungaba okwesithathu kulandelana.
Yiyo le ntokazi edlala kwiDalian Quanjian FC yaseChina edle ubhedu ngo-2014, 2016 nango-2017.
U-Ordega noKgatlana bafuna ukuwudla okokuqala.
Intokazi yaseNingizimu Afrika edlala kwiHouston Dash e-USA kodwa ibukeka izobabhincisela nxanye bobabili ebanga nabo.
Okubeka uKgatlana ethubeni elihle kulo nyaka wukuthi babanga nje nguye obabhincisele nxanye kwi-Awcon ebasea amagoli amahlanu nathathe ngawo isicathulo segolide.
UDESIREE Ellis osethubeni lokukhala emuke nesicoco somqeqeshi ovelele wesifazane emiklomelweni yeCAF eneqembu lakhe elisesimweni esifanayo sokungena emlandweni ngoLwesibili
Kulawo magoli kukhona nelisembangweni wegoli elivelele kwiCaf ngo-2018. Konke lokho akugcinanga ngokusiza iBanyana iqophe umlando wokuzibekisela okokuqala indawo kwiFifa Womens World Cup eseFrance nonyaka kodwa kuholele ekutheni ifinyelele kowamanqamu e-Awcon.
Nakuwo lowo mdlalo wamanqamu wayebajaha kube kuncane indawo abadlali beNigeria. Kuphethe ngokuthi uKgatlana akhale emuke nomklomelo womdlali ovelele kwi-Awcon.
EMinye imiklomelo emibili ebhekene iBanyana esethubeni layo ngaphezu kwale emibili kaKgatlana, ngoweCaf Team of the Year kanjalo nowomqeqeshi ovelele abamelwe kuwo nguDesiree Ellis.
U-Ellis nguye yedwa umqeqeshi wesifazane kwabathathu ababangayo. UKgatlana ngokwesibili engena embangweni womklomelo womdlali wesifazane ovelele -Afrika kanti uma ehlabana uzoba ngowesibili waseMzansi ngemuva kukaNoko Matlou ukuwuthatha. UMatlou, obekhona naye esikwatini seBanyana eGhana, udle ubhedu ngo-2008 eqeda umbuso wezintokazi ezimbili zaseNigeria uPerpetua Nkwocha noCynthia Uwak ababeshiyelane wona kusuka ngo-2004.