AKANDABA nabamsabisa ngokufa umqeqeshi waMaZulu FC, uCavin Johnson, oye emdlalweni wabo neSuperSport United kunamahlabezi okuthi kunabalandeli beqembu abafuna ukumenzakalisa.
Nokho uma ngabe bekukhona obezimisele ukususa uthuthuva emdlalweni obuseKing Zwelithini, eMlaza, ngoMgqibelo ebusuku, AmaZulu asheshe akucacisa ukuthi akukho muntu owathandayo ozobuyela ekhaya ejabhile evula ngegoli elize noSiyabonga “Bhele” Nomvethe.
USuthu lugcine lunqobe umdlalo ngo 2-0. Igoli lesibili lishaywe ngu-Ovidy Karuru.
Beluwadinga amaphuzu amathathu ngoba selulwela ukusuka emaqenjini asemsileni kwi-log ngemuva kokuqhuba imidlalo eyisikhombisa yeligi lunganqobi.
Imiphumela engemihle yiyona esisuse imvunge kwabanye abalandeli besola uJohson ngokushaya udaka nesinqumo sakhe sokungayibopheli insika uNomvethe.
“Akusho lutho (ukusatshiswa) ekugcineni sonke sizofa. Akunjalo?” kube yimpendulo kaJohnson uma ebuzwa ngalabo obekuthiwa bayamsabisa.
Ngemuva komdlalo kuvele ukuthi omunye umlandeli obethuka inhlamba eyisimanga, ugcine ekhishwe ngonogada.
UJohnson uthembise abalandeli bokuqina boSuthu ukuthi bazokwenza konke okusemandleni ukuze iqembu ligcine indawo yalo kwi-Absa Premiership. AmaZulu asenemidlalo ewu-16 lapho eqoqe amaphuzu awu-18 okuwabeke endaweni ka-13 kwi-log.
Emdlalweni olandelayo ngoLwesithathu enkundleni efanayo azovakashelwa yiBloemfontein Celtic ngo-7.30 ebusuku.
“Sizokwenza konke okusemandleni. Ngihlezi ngisho ukuthi ngifuna kungabi khona olubuyayo kule nkundla. Nginethemba lokuthi abalandeli bazolibona iqembu lidlala kwiPremiership nangesizini ezayo yize kuzoba umsebenzi onzima,” kusho uJohnson.
Uthe abadlalanga kahle kowe-United kodwa amaphuzu amathathu yiwona asemqoka.
“Ngibashayela ihlombe abadlali ngokwenza lokhu ebesikuhlelile. Sizitshelile ukuthi noma ngabe kwenzakani, okubalulekile wukuthi singangenelwa yigoli. Lokho nje kukodwa kusinikeza ukuzethemba njengoba sesibheke emdlalweni olandelayo. Ikhona imidlalo esidlale ibhola elihle kuyona kodwa sangawina.
“Lapha asidlalanga kahle kodwa sinamaphuzu amathathu ephaketheni.”