USTANTON “Stiga” Fredericks ukholelwa ekutheni uGavin Hunt, oqeqesha iBidvest Wits, ufundile emaphutheni enzeke ngesizini edlule aholele ekutheni ezakhe ziqede endaweni yesithathu phezu kokuba ziqale kahle.
Le nkakha eqale ibhola elikhokhelayo kwiZitshudeni yaphinde yagaxa amakhokho emgibeni emuva kokudlalela zona, itshele Isolezwe ukuthi ayikho into etheni eshaye ezikaHunt ngesizini edlule ngaphandle kokulahla umgqigqo emidlalweni embalwa.
UFredericks uthe uHunt, ofike kwiZitshudeni ngo-2013 ephuma kwiSuperSport United, unamava ngendlela eyisimanga njengoba isicoco seligi esesinqobe amahlandla amane. Uthe ukholwa wukuthi akumnandi kuyena ukunqoba kanye ngesizini ka-2016/2017 neWits isicoco seligi.
Isizini edlule iWits iyiqale kahle, iqhwakela kwi-log. Ngokuqhubeka kwemidlalo ilahle amaphuzu amqoka okuholele ekutheni igudluzwe iMamelodi Sundowns, egcine ingompetha, ne-Orlando Pirates elale isibili.
“I-Wits ishaywe ukulahla amaphuzu emidlalweni ewu-10. Uma uzobheka i-log uyabona ukuthi bahlukaniswe izinto ezincane neSundowns. Emidlalweni ewu-30 bobabili neDowns banqobe imidlalo ewu-16. EzikaHunt zivalele phakathi amagoli amaningi awu-45 ekubeni iSundowns ishaye awu-40. Iphutha leWits kube ukuvumela ukuhlulwa emidlalweni eyisishiyagalombili nokungenelwa amagoli awu-29. Ompetha bangenelwe ambalwa base benza isiqiniseko sokuthi okungenani badlala ngokulingana esikhundleni sokulahla wonke amaphuzu. UHunt unamava ayisimanga, uzovuka azithathe,” kubeka uFredericks
Le nkakha ebe nenhhlanhla yokudlala kuzona zombili izinkunzi zaseSoweto, iKaizer Chiefs nePirates, ithe ukufika kwabadlali abanamva abafana noSameehg Doutie ogcine ukubonakala kwiJamshedpur FC yase-India, Siyanda Zwane obebolekiswe yiSundowns kwiLamontville Golden Arrows , Prince Nxumalo obekwi-Ajax Cape Town nabanye, kuzokwenza omkhulu umehluko kwiClever Boys.
“Kungumkhuba omdala kaHunt ukulanda abadlali abanesipiliyoni, abaphelelwe yizinkontilekela emaqenjini abaphuma kuwo.
"Ngolwazi lwami lokhu kakukaze kumenzele phansi. Kanjalo nakulokhu ngikholelwa ekutheni abadlali abalethile bazongeza kokuhle okukhona."
Abanye abadlali abajoyine iZitshudeni uZitha Macheke obekwiChippa United, Carl Lark oke wadlala ezinhlakeni ezincane ze-Ajax, Ivan Mohangwahaya noPhathutshedzo Nange abaphuma kwiBlack Leopards, unozinti uBrandon Petersen obekwi-Ajax. Kwabadedeliwe kukhona uLehlohonolo Majoro, Gabadinho Mhango, Darren Keet, Denis Weidlich, Vuyo Mere, Edwin Gyimah, Sibusiso Khumalo, Daylon Claasen noBantu Mzwakali.
Mayelana namahlebezi athi uSifiso Hlanti noThulani Hlatshwayo abenze kahle kwi-Afcon, kungenzeka bayishiye iWits, uFredericks uthe: "Yebo kungavula isikhala ngoba phela wonke udlali ubaluleke ngendlela yakhe. Ngicabanga ukuthi izikhulu noHunt banalo iqhinga uma kungenzeka bahambe laba.”