USIZO lwePremier Soccer League (PSL) kwiMamelodi Sundowns ngenxa yama-quarter final eCAF Champions League okumele (iDowns) iwadlale ngo-Ephreli lungase luthwalise kanzima i-Orlando Pirates esembangweni wesicoco seligi ye-Absa Premiership.
Uhlelo olusha lwePSL lukhomba ukuthi iPirates isizokwamukela iDowns e-Orlando Stadium, ngoMsombuluko ngo-Ephreli 1. Ngokwe-website yePSL umdlalo obekumele ube ngo-Ephreli 27 ususondeziwe.
Umdlalo iPirates obekufanele ibuye ngawo ekhefini lemidlalo yeFifa neBlack Leopards ngeke usaba ngoMashi 29 kepha usuzodlalwa ngo-Ephreli 10.
Nakuba kunjalo kodwa iligi ibingakasho lutho ngomdlalo weSundowns neSuperSport United okufanele udlalwe ngo-Ephreli 7. Ngaleyo mpelasonto iSundowns izobe ibhekene ne-Al Ahly yase-Egypt kwi-quarterfinal yeChampions League.
I-PSL iphoqeleke ukuthi yenze lezi zinguquko ukusiza iDowns ukuthi ihlele kahle uma seyenza amalungiselelo ale midlalo emqoka. Okuyimbangela yalokhu ukuthi i-quarter final ingawo u-Ephreli kanti uma idlula kwi-Al Ahly ne-semi final ingenyanga efanayo.
ISundowns ezihola phambili kwi-log ishiya iPirates ngamaphuzu amathathu. La maqembu asele ngomdlalo owodwa kwamanye. Okwenza lokhu kubukeke sengathi kuzothwalisa kanzima iPirates ukuthi njengoba idlala ngo-Ephreli 1 inomdlalo omqoka ngendlela efanayo futhi ngo-Ephreli 6 neBidvest Wits.
Womabili amaqembu iPirates okumele idlale nawo asembangweni wesicoco nayo (iPirates). Uma iPirates iwina ngoMsombuluko ozayo ingazithola isilingana ngamaphuzu neDowns. Lokhu kungayibeka endaweni enhle uma inqoba kwiWits ngoba ingavula igebe lamaphuzu amathathu esicongweni.
Okungaba yinkinga kwiPirates ukukhala ngaphansi kwiSundowns. Lokhu kuzobenza baye kwiWits bexhamazela okuyinto engabanika enkulu inkinga.
Njengamanje iWits isendaweni yesibili. Ingcono ngephuzu kwiPirates kodwa isidlale owodwa ngaphezulu kwesibalo esidlalwe yiBucs.
Akungabazeki ukuthi umqeqeshi weBucs uMilutin Sredojevic uzofuna ukuzibambela amaqembu abanga nawo.