UCardoso akawasusile amehlo embangweni weseligi
UTHEMBA Zwane noThapelo Morena bejabulela iwini yeMamelodi Sundowns kwiCaf Champions League
Image: BACKPAGEPIX
IMAMELODI Sundowns iyaqonda ukuthi sekusemahlombe ayo ukusula izinyembezi zabalandeli bakanobhutshuzwayo waseNingizimu Afrika abebephupha ngowamanqamu weCaf Champions League ophakathi kwamaqembu aseNingizizmu Afrika.
ISundowns eyadla isicoco seChampions League ngo-2016 izibekisele indawo kowamanqamu nePyramids FC yase-Egypt ngokunqoba ngokuvunwa wumthetho wamagoli kwi-Al Ahly ngoLwesihlanu oludlule.
IPyramids ayigcinanga ngokuzifaka kowamanqamu wayo wokuqala emlandweni kepha iphazamise iphupho labathandi bakanobhutshuzwayo baseNingizimu Afrika abebephupha ngokubona iDowns neBucs kowamanqamu.
IPirates ebiqala ukushaywa kwiChampions League kule sizini ikhale ngaphansi ngo 3-2 sekuhlanganiswe yomibili imilenze yize ike yahamba phambili amahlandla amabili ekuhambeni.
Owomlenze wokuqala wamanqamu osekuyiSundowns ethwele kuwona wonke amathemba aseMzansi ungoMeyi 24 enkundleni eyodwa phakathi kweLucas Moripe Stadium neLoftus Versveld zombili ezisePitoli.
Kuzodlula izinsuku eziyisikhombisa iSundowns ibhekise amabombo kwelase-Egypt ngenhloso yokuyoqedela umsebenzi e-30 June Stadium, eCairo ngoJuni 1 kowomlenze wesibili.
Inkulumo yomqeqeshi weSundowns, uMiguel Cardoso abenayo nabezindaba esithangamini seCaf ikhombise ukuthi leli qembu liyaqonda ukuthi sekuyilona eliyithemba loMzansi.
Ngaphandle kokuba yithemba laseMzansi, nethuba leSundowns lokuqopha umlando lo mqeqeshi wasePortugal uyalibona.
Ngaphambi kokuthi kwenzeke konke lokho iSundowns kumele iqoqe amaphuzu agcwele emdlalweni weBetway Premiership neRichards Bay FC ngo-7.30 ebusuku eLoftus Versveld.
“Ngiyakholelwa ekutheni akufanele sizincishe injabulo ngesikwenzele iqembu, abalandeli balo nabo bonke abathandi bakanobhuthsuzwayo eNingizimu Afrika,” kusho uCardoso.
“Kumqoka nokho ukungajabuli kuze kweqe ngoba sinemidlalo emqoka neBay, Cape Town City neMagesi ngaphambi kokubuyela kwiChampions League.
“Konke esikwenzayo asizenzeli thina kepha sivikela isithunzi sezwe ngakho kungasiza nokuthi iziphathimandla kunobhutshuzwayo zikuqonde lokhu,” kusho uCardoso sakugadla kwi-Premier Soccer League.
Njengoba iSundowns idlala neBay kusasa kuzolandela oweCity ngoMgqibelo kuze oweMagesi FC ngoLwesithathu lwangesonto elizayo ngaphambi kokubhekana nePyramids kowomlenze wokuqala ngoMeyi 24.