UFUNGA uyagomela uBenni McCarthy ukuthi ngeke ayenzele umsebenzi olula i-Orlando Pirates ebonakala isendleleni ebheke ekunqobeni isicoco seligi ngemuva kweminyaka eyisikhombisa yasigcina.
I-Pirates esalelwe imidlalo emibili kusongwe iligi, ihleli esicongweni ngamaphuzu awu-53. Ngemuva kwayo kukhona iMamelodi Sundowns enamaphuzu awu-50, bese kuhlala iBidvest Wits ngawu-48.
Iqembu likaMcCarthy, iCape Town City libambe indawo yesine ngamaphuzu awu-47 kulandela ukushovela iChippa United ngasemsileni we-log, liyihlula ngo 2-0 ngempelasonto.
EzikaMcCarthy bezize emdlalweni zisanda kugixabezwa ngamaphuzu amathathu yikomiti eliqondisa ubugwegwe lePremier Soccer League (PSL), elithole iBloemfontein inecala ngokungaqinisi ezokuphepha emdlalweni ongaphelanga wala maqembu emasontweni edlule.
ICity isidlalile neSundowns neWits emzuliswaneni wesibili weligi wale sizini, yakwazi ukubuyisa izinduku njengoba uMcCarthy esesongela iPirates.
Iguqise iZitshudeni ngo 3-2 ekuhambeni, yashaya iSundowns ngo 2-1 eKapa. Umdlalo wayo neZimnyama use-Athlone Stadium ngoMgqibelo ngo-3 ntambama.
“Sifuna ukubanyakazisa. Ngicabanga ukuthi nangesonto elizayo ithuba elikahle lokwenza lokho. Kumele sidedele ibhomu laphaya (embangweni) kushunqe kubonakale ukuthi kuzokwenzekalani,” kusho uMcCarthy.
Ukhuluma kanjena lo mqeqeshi, iPirates ishayela phezulu njengoba isikwaze ukuqoqa amaphuzu awu-12 emidlalweni emine edlule. Empeleni iqembu likaMilutin “Micho” Sredojevic, alikahlulwa emidlalweni eyisithupha edlule, emibili yayo eliyidlale ngokulingana.
“Ngasho ukuthi kwiWits, iSundowns nePirates sifuna ukubashukumisa balwe bodwa. Sifuna uye emidlalweni yokugcina lo mbango okuzokwenza uhehe. Sifuna kufike umdlalo wokugcina omunye ebheke ukuthi awine, omunye emincele omunye ukudlala ngokulingana. Kube nokudideka,” kusho uMcCarthy.
Uma iPirates iyinqoba imidlalo yayo emibili esele izoqeda namaphuzu awu-59 esicongweni. ISundowns yona izogcina inamaphuzu awu-59 uma inqoba yonke imidlalo emithathu esele okukhona nowakusasa ezobhekana kuwo neBlack Leopards eThohoyandou Stadium ngo-3 ntambama.
Nokho iSundowns isalinde isigwebo sayo ngokudlalisa uWayne Arendse kungafanele, okungenzeka iphucwe amaphuzu.