OwePirates angase aphoqeke ukuthambisela i-Arrows
KUBHEKWE ngabomvu ukuthi i-Orlando Pirates izombophela yini uRelebohile Mofokeng koweGolden Arrows njengoba enamakhadi amathathu aphuzi
Image: BACKPAGEPIX
IZINQUMO ezinzima ngabadlali abamqoka ezibhekene nomqeqeshi we-Orlando Pirates, uJose Riveiro, zingase zithambisele iLamontville Golden Arrows emdlalweni weBetway Premiership namuhla ngo-7.30 ebusuku eMoses Mbhida Stadium, eThekwini.
IPirates enethuba lokuzijwayeza iMoses Mbhida ngaphambi kowamanqamu weNedbank Cup neKaizer Chiefs ngoMgqibelo enkundleni efanayo, kumele iqale iqoqe amaphuzu kwi-Arrows uma isazimisele ngokumisa kabi iMamelodi Sundowns embangweni wesicoco seligi.
Leli qembu laseSoweto likholwa wukuthi lisekhona embangweni wesicoco elisele kuwona ngamaphuzu angu-12 kwiSundowns ephambili ngemidlalo emibili.
ISundowns inamaphuzu angu-61 emidlalweni engu-24 bese kuthi iBucs ilale isibili kwi-log ngamaphuzu angu-49 kweyeligi engu-22.
Ngaphambi kokuthi uRiveiro azixake ngokucabanga ngetulo okufanele alibophele iChiefs kumele anqume ukuthi uzobasebenzisa yini kowe-Arrows oRelebohile Mofokeng, Patrick “Tito” Mswanganyi noThapelo Xoki.
Bobathathu laba badlali banamakhadi amathathu aphuzi okubabeka engcupheni yokweqiwa umdlalo wamanqamu obhekwe ngabomvu kusukela iPirates ishaye iChiefs ngo 2-1 koweligi ngoMgqibelo odlule.
Ngeke badlale kowaBafana Bes’thende oThalente Mbatha noNkosinathi Sibisi ngenxa yawo amakhadi.
Kusukela uRiveiro afika kuleli ngo-2022 akakaze akhale ngaphansi emdlalweni weNedbank okufakazelwa yizinkomishi ezimbili zalo mqhudelwano onentshontsho lika-R7 million afike wazivalela kulandelana ekhabetheni leBucs.
“Ayikho into engikhuthaza njengokubona abadlali bePirates beqhubeka nokuzinikela ngisho sesiqhuzukile kwiCaf Champions League,” kusho uRiveiro ngoMgqibelo.
“Kule midlalo esisalele akusho lutho ukuthi kuzodlala bani kodwa wonke umdlali wePirates ozobe esenkundleni yingoba kuzobe kumfanele.
“Ngiyayijabulela injejane yeqembu ngoba iyazibonela ukuthi uma izinikela liyavela ithuba eqenjini elikhulu,” kusho lo mqeqeshi waseSpain.
Ngaphandle kokuthola ithuba lokuvala igebe kwiSundowns, iPirates isethubeni lokuzijwayeza inkundla ngaphambi kowamanqamu.
Lokhu kuyibeka ethubeni elikahle lokusheshe ijwayele izinto kwazise ngeke isabuyela eGoli ngemuva komdlalo wanamuhla.
Izinkinga ngesimo sensimu yaseMoses Mbhida ezike zavela emasontweni adlule azizange ziyivimbe i-Premier Soccer League (PSL) ukshenxisela kuyona lo mdlalo owahlehla ngoFebhuwari ngenxa yemvula enamandla kokwakufanele udlalelwe eMpumalanga Stadium.
Isolezwe lizamile ukuyozibonela isimo senkundla kodwa langaphumelela kodwa lihabule ukuthi isimo sensimu siseqophelweni eliphezulu.
Abebekwikhonsathi yomculi wase-USA, uRick Ross, ebiseMoses Mbhida ngempelasonto babike ukuthi insimu ibibiyelwe ngocingo igadiwe ngaso sonke isikhathi.