STHEMBISO NGOBESE
UMQEQESHI weTS Galaxy, u-Owen da Gama, ukhala ngezinqumo zonompempe njengoba iqembu lakhe lilokhu liqhubeka nokulahla amaphuzu amqoka emidlalweni yalo yakamuva kwiDStv Premiership.
Ngempelasonto, iThe Rockects ihlulwe ngo-2-0 yiTshakhuma Tsha Madzivhandila emdlalweni wokubanga amaphuzu obuse-Emirates Airline Park Stadium, eGoli.
Amagoli eTshakhuma eqeqeshwa nguMpho Maleka ngokubambisana noDavid “DVD” Mathebula, abekwe enethini nguBrandon Theron noThabo Rakhale ngokwehlukana kweziwombe.
Ukunqoba kweTTM lapha kuyiphefumulise kancane empini yezembe njengoba isinyukele endaweni ka-14 ngamaphuzu awu-19 emidlalweni ewu-21. Ngakolunye uhlangothi, iGalaxy yona isahlezi endaweni yesishiyagalombili ngamaphuzu awu-26 emidlalweni ewu-22.
Lona besekungumdlalo wesithathu weGalaxy ihlulwa kulandelana kwazise ngaphambi komdlalo wayo neTTM, ihlulwe yiMariztburg United ngo-2-0 yaphinde yaguqiswa ngo-2-1 yiBloemfontein Celtic.
Ngemuva komdlalo, uDa Gama uzwakalise ukukhathazeka okukhulu ngendlela onompempe abathatha ngayo izinqumo emidlalweni yabo.
“Njengamanje sibhekene nesimo esinzima kakhulu lapha ekilabhini njengoba imiphumela ingasivumi, ngaphezu kwalokho futhi nezinqumo ezithathwa ngonompempe emidlalweni yethu ziyashaqisa kakhulu.
“Siyawakhanda amathuba futhi siwashaye namagoli kodwa ekugcineni lawo magoli agcine engabalwanga ngezizathu esingazazi. Impela ziyethusa kakhulu izinqumo ezithathwa ngonompempe enkundleni,” usho kanje uDa Gama.
Lo mqeqeshi uqhube wathi njengoba bephinde behlulwa kuzomele babuyele emuva ukuyolungisa izinto.
“Lona bese kungumdlalo wethu wesithathu sihlulwa kulandelana nokuyinto eqalayo ukwenzeka selokhu ngithathe izintambo zokuqeqesha lapha eqenjini. Lokhu ngikubona kufaka ingcindezi enkulu kubadlali bami njengoba abanye babo babuye benze amaphutha okungafanele ngabe ayenzeka kubadlali abadlala esigabeni esikhulu.
“Kodwa-ke kuzomele sibuyele emuva siyolungisa izinto, ngaphezu kwalokho futhi kumele siyibongele iTshakhuma ngokunqoba lapha.”
UMaleka uthe isimo abakuso njengamanje kwi-log siyabakhathaza kakhulu kodwa bajabulile ngokuqoqa amaphuzu agcwele kulo mdlalo.
Uthe izinguquko abazenzile esiwombeni sesibili zibe nomthelela omkhulu ekutheni banqobe kulo mdlalo.