OweCity umangalele iPSL ngomdlalo osindise iSuperSport
USIHLALO weCape Town City ofuna i-PSL imchazele kahle ukuthi iwuvumele kanjani ukuthi uqhubeke ngemuva kwezinyanga ezintathu oweSuperSport ne-Arrows
Image: BACKPAGEPIX
IPREMIER Soccer League (PSL) iphoqwe ngusihlalo weCape Town City, uJohn Comitis, ukuba iphendule phambi kukamahluleli ngezinsolo zokuphula umthetho owabekwa yile nhlangano kodwa esihluleka ukuwusebenzisa.
UComitis utshele abezindaba ngoMsombuluko eKapa ukuthi ufuna iPSL icacise ukuthi yavuma kanjani ukuthi kuqhutshwe ngemuva kwezinyanga ezintathu umdlalo weBetway Premiership obuphakathi kweSuperSport United neLamontville Golden Arrows owamiswa ngoFebhuwari 23.
Ngalolo suku asiqhubekanga isiwombe sesibili ngenxa yokucima kukagesi zibambene ngo 1-1. Sekungumlando ukuthi lo mdlalo uqedelwe ngoLwesine olwedlule okwenza uComitis angawamukeli umphumela wawo.
Ngaphandle kobulungiswa, uComitis ulwela nokuthi kungabi yiqembu lakhe eliya kweyokuhlunga kepha kube yiSuperSport akholelwa ekutheni kwakufanele iphucwe amaphuzu ngawo uFebhuwari anikwe Abafana Bes’thende.
Umthetho olawula iPSL (Article 14.16) ukhomba ukuthi lo mdlalo kwakufanele uqedelwe engakapheli amahora angu-48 umisiwe.
“Liyangena icala kumahluleli emahhovisi ePSL eGoli ngoLwesithathu (namuhla). Le nhlangano kufanele ichaze ukuthi iwuphule kanjani umthetho wayo ngokubuyisela umdlalo enkundleni esikhundleni sokuhlawulisa iSuperSport eyahluleka ukwenza okwakulindeleke kuyona,” kusho uComitis.
“Silawulwa yimithetho eyabekwa ngoba kunezizathu ngakho-ke kusemqoka ukuthi sonke siyilandele. Kungenzeka konakale okuningi njengokuhlehla kokuqala kweligi ngoba noma ngubani ongahambisani nesinqumo esizophuma unegunya lokuluqhubeza udaba."
AmaCitizens aqede isizini ebambene neSuperSport ngamaphuzu angu-27 kodwa leli qembu laseKapa lawela kweyokuhlunga ngenxa yesibalo esincane samagoli.
Isolezwe lakhuluma noRonnie Schloss, oyiChief Operations Officer (COO), ngoMashi wakuqinisekisa kuleli phephandaba ukuthi umdlalo owamiswa weSuperSport ne-Arrows wawuzocaciswa isinqumo seDispute Resolution Chamber (DRC) yePSL.
Njengenjwayelo iPSL ayikaze isho lutho ngalesi sinqumo sayo ngaphandle kokumemezela kwabezindaba ukuthi oweSuperSport ne-Arrows uzoqhubeka enkundleni owawudlala kuyona (Lucas Moripe Stadium) imizuzu engu-45 eyayisele.
Noma ngabe yisiphi isinqumo esizophuma namuhla, kubukeka sengathi isazoqhubeka nokuhlehla imidlalo yokuhlunga esivele ihlehlile. Ngokwe-log iCity kumele idlale neCasric Stars ne-Orbit College abaqede endaweni yesibili neyesithathu kwiMotsepe Foundation Championship.