EMINYAKENI eminingi edlule uWinnie Madikizela-Mandela esavakashela uNelson Mandela ejele laseRobben Island, umoya wawusuke uphukile.
Yize engasekho emhlabeni kodwa ukuveza intokozo yakhe umoya wakhe uzovunguzela eKapa uchichima injabulo ngoJanuwari 19.
Lokhu kungenxa yokuthi ngalolu suku iBanyana Banyana izobe igubha amagalelo akhe ngomdlalo wokungcweka neNetherlands kwiWinnie Madikizela International Challenge eCapeTown Stadium, ngomhla ka-19 kwephezulu.
Ngomhla ka-17 iBanyanga izokuba nomdlalo wokubhula amazolo ngomdlalo neSweden ozodlalwa ngaphandle kwezibukeli. Mhla ka-22 baphinde neSweden kozovuleleka kubathandi bebhola eCapeTown Stadium ngo-7 ebesuku.
Akusikho nje ukukhunjulwa kwamagalelo akhe kuphela okuzomjabulisa ngalolu suku, kodwa okukhulu wukuthi iBanyana izolugubha lolu suku igabe ngoThembi Kgatlana onqobe iCaf African Women Footballer of the Year nomklomelo wegoli lonyaka noDesiree Ellis oqwaqwade nabesilisa eqokwa njengomqeqeshi ovelele e-Afrika.
NoKgatlana uqwaqwade izinsizwa emklomelweni wegoli emcimbini obuseDakar, eSenegal ngoLwesibili ebusuku.
Umqondo wezindlovukazi zebhola lase-Afrika uvele nephini lomqeqeshi kwiBanyana, uThina Mbuli, oxoxe neSolezwe ngoMgqibelo esekhempini yesikwati eKapa. “Yizo izinto abazizabalazela omama Winnie lezi (ebhekise empumelelweni ka-Ellis noKgatlana). Uma ukhuluma ngomama uWinnie ukhuluma ngelinye lamaqhawe esifazane. Umuntu owasebenzela isizwe ngaphandle kokubheka inzuzo. Kulo mdlalo wokumhlonipha siphethe izindlovukazi zebhola lase-Afrika kuhambisana kahle nomzabalazo wakhe. Naye lapho ekhona uzobe ejabula."
IBanyana ihlangane ekhempini eKapa ngoLwesithathu. Izoqala amalungiseleli e-2019 Fifa Women’s World Cup ezobe idlala kuyo okokuqala. Lo mqhudelwano uzodlalelwa eFrance kusukela ngoJuni 7 kuya kuJulayi 7. Ngaphambi kweNetherlands bazodlala neSweden khona eKapa ngoJanuwari 19.
Ngemuva kwalokho baya kwi-USA eMiami. “Bekubalulekile siqale umdlalo ngenothi eliphezulu ngale ndlela. Wunyaka omkhulu ebholeni labesifazane eMzansi.
"Sivula ngemiklomelo emikhulu nemidlalo emikhulu nabantu okuyibo impela abanomlando ophathekayo ebholeni labesifazane emhlabeni. Yiyona ndlela eqondile yokulungiselela iWorld Cup,” kusho uMbuli.
Uthe kusukela kuhlabane * -Ellis noKgatlana, isasasa liphezulu kubadlali ungathi bonke bathole imiklomelo.
“Ungafunga ukuthi boke bathole le miklomelo ngendlela abanomdlandla ngayo. Bekuzoba nzima ukubaduduza ukuba akuhambanga kahle kodwa namanje umsebenzi usekhona, kufanele sibabuyise sibakhumbuze ukuthi use mukhulu umsebenzi osihlalele,” kusho uMbuli.
IBayanga izokuthi iqeda kule midlalo amabombo iwabhekise eCyprus lapho iyodlala khona kwiCyprus Women’s Cup.