Owe-Arrows uthi badinga iwini ukubuyela emgqigqweni

UMDLALI wasesiswini kwiLamontville Golden Arrows, uNduduzo "Sulumane" Sibiya, uthi kumele banqobe umdlalo owodwa ukuze babuyele emgqigqweni wabo emuva kwemidlalo emine, bedlala ngokulingana kulandelana.

USibiya (26), ungomunye wabadlali abebegqamile ngoLwesithathu ngenkathi ezakhe zibambana ngo 0-0 ne-Orlando Pirates koweDStv Premiership, e-Orlando Stadium, eSoweto.

USibiya ucishe washaya igoli leGolden Arrows ngoLwesithathu, eshaya ingcwenga ye-free kick eshaye ipali yaphumela ngaphandle selimudle lamqeda unozinti wePirates, uSiyabonga Mpontshane ngesiwombe sokuqala.

Ukwehluleka kwe-Arrows ukuthola iwini kusho ukuthi seyidlale imidlalo emine ngokulingana, ilandelana. Igcine ukunqoba ngoDisemba 4, ishaya iChippa United ngo 2-1.

I-Arrows izolwela iwini yokuqala kulo nyaka namuhla ngo-3.30 ntambama, ibhekene neCape Town City ePrincess Magogo Stadium KwaMashu, eThekwini.

"Ngendlela ebesidlala ngayo kuloya mdlalo wangoLwesithathu nePirates, besingawunqoba ukuba siwasebenzise ngendlela amathuba ambalwa esiwatholile, ikakhulukazi leya free-kick engiyishaye yacishe yadla phakathi.

Ngicabanga ukuthi ukuba leya free-kick ingenile ibizokwenza umehluko, iwushintshe umdlalo wethu ungene kwelinye igiya. Nokho, lokho sekwedlule, esesikubhekile manje ukulwela amaphuzu kulo mdlalo esiyowudlala neCape Town City. Siyazi ngeke kube umdlalo olula kodwa sizimisele ukulwela ukubuya namaphuzu mdlalo," kusho uSibiya.

I-The Citizens nayo okungayihambeli kahle muva nje, iwadinga ngokufanayo amaphuzu kulo mdlalo ngoba ivale unyaka ngesibhaxu ishaywa yiSuspersport United ngo 3-2 kowePremiership, yaphinda ngeledlule yawashiswa ijezi yiRoyal AM iyishaya ngo 2-1 koweNedbank Cup Last 32.

Lesi sikhwishikhwishi somdlali wasesiswini omandla ngokushoshela phambili, siyakuqonda ukubaluleka kokuba Abafana Bes'thende, bathole amaphuzu emidlalweni emihlanu elandelayo esemqoka abasazoyidlala.

"Siyawadinga kakhulu amaphuzu emidlalweni yethu elandelayo, kumanje yonke imidlalo esizoyidlala izofana neyefayineli. Sidinga iwini eyodwa nje, okuyiyona ezosibuyisela emgqigqweni wethu, ilenyuse kakhudlwana nezinga lokuzethemba emidlalweni elandelayo," kuqhuba uSibiya.

Kule midlalo emihlanu elandelayo kubalwa oweMaritzburg United ezowudlala ngoLwesihlanu, eHarry Gwala Stadium, eMgungundlovu.

Ngemuva kwalo mdlalo iqembu elicijwa nguLehlohonolo Seema lizolandelisa ngeChippa United (ekhaya), Kaizer Chiefs (ekuhambeni), neSupersport United (ekhaya), neStellenbosch FC (ekhaya).

Imidlalo yeDStv Premiership:

Namuhla ngo-3.30pm:

Golden Arrows v Cape Town City (Princess Magogo Stadium); Sekhukhune United v Baroka FC (Ellis Park Stadium)