OwaMajita usebheke izimanga kwiNdebe yoMhlaba
IQEMBU lesizwe laseMzansi labaneminyaka engaphansi kwengu-20 lijabulela ukunqoba kwiDRC kowe-quarter final ngoLwesibili ebusuku kwelase-Egypt
Image: BACKPAGEPIX
OKUBONWE ngumqeqeshi waMajita (U/20), uRaymond Mdaka, ngesikhathi iqembu lakhe lizibekisela indawo kowandulela owamanqamu we-Africa Cup of Nations (Afcon) U/20 kukhulise ukuzethemba kuyena ngamathuba okwenza kahle koweNdebe yoMhlaba.
UMdaka uswele amaphiko kulandela ukunqoba kwakhe ngo 1-0 kwiDemocratic Republic of Congo (DCR) ngoLwesibili ebusuku eSuez Canal Stadium e-Egypt.
Amajita anqobe ngegoli likaThabang Mahlangu alishaye kwi-extra time, azobhekana neNigeria kowandulela owamanqamu kusasa. INigeria inqobe ngo 3-0 kwiSenegal sekukhahlelwa amaphenathi.
Omunye ozokhipha iqembu eliya kowamanqamu uphakathi kosokhaya i-Egypt nomakhelwane bayo iMorocco.
Eyandulela eyamanqamu iqala ngowaMajita neNigeria kusasa ngo-5 ntambama eSuez Canal, kulandele owe-Egypt neMorocco ngo-8 ebusuku eJune 30 Stadium, eCairo.
Ngokuzibekisela indawo kweyandulela eyamanqamu, Amajita azifake koweNdebe yoMhlaba eChille ngoSepthemba.
Kuzodlula isikhathi esincane kwenzeke lokhu, iqembu lesizwe laseNingizimu Afrika lika-Under 17 lidlale iNdebe yoMhlaba eQatar ngoNovemba.
UMdaka uthe ukufaka kwiNdebe yoMhlaba iqembu lika-Under 20 kuseqhulwini ezintweni aseke wazizuza engumqeqesghi kanobhutshuzwayo.
“Injabulo isifanele ngoba emdlalweni weDRC kudingeke ukuthi siwakhiphe wonke amangwevu esinawo kusukela ekuzinikeleni, ekuyilaleleni injengoba injalo imiyalelo nasekuzimiseleni ukufela iNingizimu Afrika enkundleni,” kusho uMdaka ethimbeni labezindaba leSafa.
“Kusukela ngaqala ukuqeqesha angikholwa wukuthi ikhona into engaphezulu kwale esengike ngayenza. Ngiswele amaphiko ngenxa yenjabulo nokuzizwa ngihloniphekile."
Ngesikhathi Amajita egcina ukudlala kweyoMhlaba ka-U/20 ngo-2019 ePoland ngaphansi kukaThabo Senong, ayeyibambe ngabadlali abafana noNjabulo Blom, Oswin Appollis, Lyle Foster, Kobamelo Kodisang nabanye.