UMDLALI weBafana Bafana uBongani Zungu usehoxile esikwatini seqembu esizobhekana neMali emdlalweni weNelson Mandela Challenge ozobe useNelson Mandela Bay Stadium, ePort Elizabeth ngeSonto.
UZungu ulimale emlenzeni wesinxele ngenkathi edlalela iqembu lakhe laseFrance i-Amiens SC. UZungu, oyibamba enkabeni yesisu, ushaye amagoli amabili ngenkathi iBafana ifinyelela kuma-quarterfinals e-Africa Cup of Nations ebise-Egypt kulonyaka.
Umdlali wasesiswini weHighlands Park, uMothibi Mvala usebiziwe ukuthi ezovala isikhala sikaZungu. UMvala useqalile ukuziqeqesha neqembu njengoba efike ekhempini yeBafana esePort Elizabeth izolo ebusuku.
UThamsanqa Mkhize noBrandon Peterson bangabanye abadlali abahoxile eqenjini ngenxa yokulimala. Izikhala zalaba badlali zivalwe ngoTshepo Rikhotsho noRicardo Goss.
U-Eric Mathoho noDean Furman nabo bafike ekhempini yeqembu belimele. UMathoho uhlushwa yiqakala kanti uFurman ulimele idolo. Bobabili labadlali basekhempini futhi bazohlolwa.