KULINDELWE uNgqongqoshe wezeMidlalo, amaSiko nezokuNgcebeleka, uNathi Mthethwa, alethe inhlansi ngezinye zemidlalo okubalwa kuzo ibhola ezisale ebumnyameni ngoLwesine uNgqongqoshe wezokubusa ngoKubambisa, uNkosazana Dlamini-Zuma, evulela kuphela leyo midlalo okungathintwana kuyo ukuba ibuye esigabeni sesithathu sikathaqa wezwe.
UDlamini-Zuma, ngoLwesine obeyingxenye yongqongqoshe abebechaya imigomo yesigaba sesithathu izwe elizokwehlela kuso ngoMsombuluko, uthe imidlalo okungathintwana kuyo izovunyelwa ukudlala ngaphandle kwezibukeli.
Emidlalweni uDlamini-Zuma abekhuluma ngayo kubalwa igalofu, ithenisi, ikhilikithi abantu abayidlalayo abangathintani kuyo.
UDlamini-Zuma usho kanjena nje, siphezulu isizungu sezemidlalo kwazise selokhu zimiswe umhlaba wonke maphakathi noMashi kubheduka iCoronavirus.
Lokhu kuholele ekutheni eminye imiqhudelwano emikhulu ebizoba kulo nyaka njengama-Olympics, ihlehliselwe unyaka ozayo.
Isikhalo esikhulu sikunobhutshuzwayo, olandelwa yizinkumbi emhlabeni futhi ophila ngabatshali zimali nabalandeli.
Ibhola nalo selokhu limiswe ngoMashi kanti amanye amaligi aseyicishile isizini njengaseBelgium, France, Netherlands, Ethiopia, Guinea namanye asedlulile eshumini e-Afrika.
IGermany Bundesliga inike ithemba lokubuya kwebhola ibuyela enkundleni ngaphandle kwabalandeli ngesonto eledlule.
ENingizimu Afrika kusaminciwe kwazise iSafa neNSL sebeze baqoka ithimba eliyisipesheli elizohlangania umbiko ozolandelwa yizincomo ezizothunyelwa kuMthethwa nohulumeni.
UMthethwa nokho ubaliwe kozakwabo abazokhuluma nezwe kwesinye isithangami ngoLwesihlanu kanti yilapho okulindelwe anike inhlansana ngekusasa lemidlalo enjengebhola okuthintwanwayo kuyo uma idlala.
@malbingo @IsolezweNews