‘NGEKE sibe nalo ithuba lokucasha ngesithupha uma singahluleka ukufaka izwe kwi-Africa Cup of Nations (Afcon) ese-Egypt maphakathi no-2019.”
Lawa amazwi ashiwo yinjini yeBafana Bafana, uKamohelo Mokotjo oseTunisia naleli qembu lesizwe elinomdlalo onzima futhi omqoka.
Lo mdlalo wokusonga u-Group E, iBafana izowugijima neLibya ngeSonto ngo-7 ebusuku eStade Taieb Mhiri, eSfax, eTunisia.
IBafana, esendaweni yesibili kuleli qoqo, idinga okungenani iphuzu ukuze izibekisele indawo e-Egypt. NgokukaMokotjo, akukho okungavimba iBafana lapha inqobo nje uma bona njengabadlali bezongena enkundleni bekuqonda kahle okulindeleke kubona.
“Konke kuhlangene kahle. Sifike ekhempini sonke sisefomini, ngakho-ke ngeke sibe nalo ithuba lokucasha ngesithupha uma sihluleka ukuthola umphumela odingekayo lapha. Kusemqoka ukuthi sikhohlwe ngokwenzekile sigxile kwesibhekene nakho manje. Siyabazi ukuthi badlala kanjani esibhekene nabo ngakho-ke kusemqoka ukusebenzisa lezi zinsuku esinazo ukuqinisekisa ukuthi izinhlelo zethu ziyahlangana ukuze sithole umphumela ozosiwezela ngaphesheya,” usho kanje.
Kusukela iBafana ifikile eTunisia isimo sezulu akusona esijwayelekile enhla nase-Afrika kwazise kunezimvula yize zingenzima kangako. UMokotjo odlala e-England ukujwayele ukudlala emvuleni.
“Sihle isimo sezulu kithina sonke. Uma izulu linje kudlaleka kangcono. Angizikhulumeli ngedwa kepha ngifaka nabo bonke abanye abadlali. Sidlala ibhola elisheshayo, ngakho-ke kuvuna thina ukuthi isimo sezulu sinje. Liyana noma liphumile ilanga akufanele kusinike inkinga lokho ngoba okusemqoka ukuqinisekisa ukuthi sikwi-Afcon maphakathi nonyaka,” kusho lo mdlali weBrentford.
Mayelana namazwi enkuthazo kubalandeli uthe, bengabadlali bayaqonda ukuthi abazidlaleli bona kepha bamele izwe lonke wase ethembisa ukuthi bazoqinisekisa ukuthi konke kuhamba ngokwezifiso zabalandeli.