OBENGUMQEQESHI weKaizer Chiefs uGiovani Solinas. Isithombe: BackpagePix

IBHANTSHI ligcwale umoya kumqeqeshi weKaizer Chiefs uGiovani Solinas obephikwa yimiphumela kuleli qembu.

IChiefs imemezele lezi zindaba ekhasini layo kuTwitter kanti iveze ukuthi noyiPhini lakhe uPatrick Mabedi ukhonjwe indlela.

“IKaizer Chiefs noGiovani Solinas bavumelene ngokunqanyulwa kwenkontileka yakhe njengamanje. Simufisela okuhle,” kusho isitatimende esikhishwe yiChiefs.

Leli qembu laseSoweto lixosha lomqeqeshi nje ibilokhu yande njalo ingcindezi ebivela kubalandeli ukuthi akhululwe ngoba bengaboni ukuthi ulisaphi iqembu.

Kamuva nje usanda kutitinywa yi-Orlando Pirates emdlalweni oncishe iChiefs ithuba lokuzibekisela indawo kowamanqamu kwiTelkom Knockout.

Yize iChiefs inqobe kalula kwiCAF Confederation Cup lapho ishaye khona iZimamoto yaseZanzibar, ihluleke yancama ukuqhubeka lapho ibigcine khona ishaywa yi-Arrows ebingasaphelele ngo 2-1.

Emidlalweni ewu-14 yeligi, iChiefs isishaywe kane. Idlale ngokulingana kweyisithupha yase inqoba emine okuyishiya endaweni yesikhombisa kwi-log.

IChiefs izobhekana neSupersport United,Mamelodi Sundowns, Bidvest Wits, AmaZulu neCape Town City FC. 

Kubaqeqeshi abamataniswa naleli qembu kubalwa noRuud Krol owake washaya into ecokeme eqeqesha i-Orlando Pirates.